नेपाल कम्युनिस्ट पार्टी नेकपाका उपाध्यक्ष एवं उपप्रधान तथा रक्षामन्त्री ईश्वर पोखरेलले दुई अध्यक्षबीच आलोपालो प्रधानमन्त्री हुने सहमति नभएको दाबी गरेका छन् । विराटनगर विमानस्थलमा शुक्रबार सञ्चारकर्मीसँग उनले प्रश्न गरे, ‘नेकपाका अध्यक्षद्वयबीच आलोपालो सरकारको नेतृत्व गर्ने विषय बाहिर आएको छ, केपी ओली र प्रचण्ड आलोपालो प्रधानमन्त्री हुने भनेर कहाँ सहमति भएको छ ?’

यद्यपी, आवश्यकताअनुसार पार्टीको निर्णयअनुसार पदीय जिम्मेवारी भने हेरफेर हुनसक्ने पोखरेलको भनाइ छ । मिडियामा आएजस्तो प्रधानमन्त्री ओली र अध्यक्ष प्रचण्डबीच कुनै विवाद नरहेको उनको प्रस्टोक्ति छ ।

‘सशस्त्र जनयुद्धलाई अपराधसँग जोड्न मिल्दैन‘

रक्षामन्त्री पोखरेलले तत्कालीन माओवादीले चलाएको सशस्त्र जनयुद्धलाई अपराधसँग जोडेर हेर्न नहुने बताए । ‘विगत र आगतमा भएका जस्तासुकै अपराधको अनुहार नहेरी सरकारले अनुसन्धान गर्छ,’ उनले भने, ‘तथ्यसहित बाहिर आएका आपराधिक घटनामा संलग्नको अनुहार र पद केही नहेरी सरकारले कारबाही गर्छ, तर तत्कालीन माओवादीले चलाएको सशस्त्र जनयुद्धलाई अपराधसँग जोडेर हेर्न मिल्दैन ।’

मन्त्री पोखरेलले बिप्लव समूहले हत्या हिंसा नत्यागेसम्म वार्ता हुन नसक्ने दोहोर्‍याए ।

प्रकाशित समय १३:०३ बजे