प्रतिनिधिसभाको समानुपातिकतर्फ रिक्त एक पदको लागि आज गुल्मीकी सुवर्ण ज्वारचनले पद तथा गोपनीयताको सपथ लिने भएकी छन् । नेपाली कांग्रेसको तर्फबाट बाग्लुङबाट प्रतिनिधित्व गर्ने ज्ञान कुमारी छन्त्यालको २०७७ असार १७ गते निधन भएपछि प्रतिनिधि सभा सदस्यको सो स्थान रिक्त छ ।

छन्त्यालको निधन भएपछि उनको स्थानमा ज्वारचनलाई सांसद बनाउन संसद सचिवालयमा नाम सिफारिस गरेको थियो । आज आइतबार दिउँसो २ बजे संघीय संसद सचिवालयको कृषि समितिको हलमा सभामुख अग्नि सापकोटाले ज्वारचनलाई पद तथा गोपनीयताको सपथ खुवाउने संसद सचिवालयले जनाएको छ ।

समानुपातिक तर्फको कुनै सांसदको निधन भएमा सोही सामावेशी समूहअन्तर्गत पार्टीले निर्वाचन आयोगमा बुझाएको बन्दसूचीको पहिलो नम्बरमा रहेको व्यक्ति स्वतः सांसद बन्न पाउने कानुनी व्यवस्था छ ।

प्रकाशित समय १२:४३ बजे