सत्तारुढ नेपाल कम्युनिस्ट पार्टी नेकपाका सचिवालय सदस्य एवं प्रवक्ता नारायणकाजी श्रेष्ठले पार्टी एकताको रक्षा नेकपाको बटमलाइन भएको बताएका छन् । पार्टीभित्र सल्किएको आगो निरुपण नभइरहँदा कतै नेकपा विभाजन हुने त होइन भन्ने आशंकाका बीच उनको यस्तो अभिव्यक्ति आएको हो ।

उनले सामाजिक सञ्जालमा छन्, ‘पार्टी एकताको रक्षा यतिबेलाको हाम्रो बटमलाइन हो । यसको उद्देश्य राष्ट्रिय सार्वभौमिकता एवं अखण्डताको रक्षा, लोकतन्त्रको रक्षा एवं विस्तार, समाजवाद उन्मुख सामाजिक आर्थिक रुपान्तरण हो । तसर्थ पार्टी एकताको रक्षा, यथास्थितिमा गुणात्मक परिवर्तन र महाधिवेशनको तयारीलाई निकासको सूत्र बनाऔँ ।’

नेकपामा अहिले एकता महाधिवेशनको चर्चा सुरु भएको छ । अफ्ठ्यारोमा परेपछि प्रधानमन्त्री केपी शर्मा ओलीले अघि सारेको ‘मंसिरमै महाधिवेशन गर्ने’ प्रस्तावमा नेताहरू सहमत छैनन् ।

प्रवक्ता श्रेष्ठले एकता महाधिवेशनको चर्चा हुनु राम्रो र खुसीको कुरा भएको बताएका छन् । ‘पार्टी एकताको संक्रमणकाल अन्त्य गर्न आवश्यक तयारी पूरा गरी यथाशीघ्र महाधिवेशन सम्पन्न गर्नैपर्छ तर महाधिवेशनलाई प्राविधिक विषयमात्र बनाउनु हुँदैन । वैचारिक कार्यभारलाई केन्द्रमा राखी सांगठनिक कार्यभारसमेत पूरा गर्ने गरी महाधिवेशनको तयारी गरौं,’ उनले भने, ‘यसो गर्दा आगामी मंसिरमा नै महाधिवेशनको आयोजना गर्न सम्भव देखिन्न । त्यसैले हचपच र ढिलाइ दुवै गलत हुन्छन् । केन्द्रीय कमिटीको यससम्बन्धी निर्णयलाई ध्यान दिँदै उपयुक्त समय निर्धारित गरी महाधिवेशनको तयारीमा अघि बढौं । महाधिवेशनलाई एकता र वैचारिक संश्लेषण एवं विकासको महाधिवेशन बनाऔं ।’

प्रकाशित समय १४:१३ बजे