पार्टी सञ्चालन नियमावली पारित गर्न नेपाल कम्युनिस्ट पार्टी (नेकपा) को पहिलो स्थायी कमिटी बैठक शनिबार बस्ने भएको छ । शनिबार अपराह्न प्रधानमन्त्री निवास बालुवाटारमा बस्ने बैठकमा महासचिव बिष्णु पौडेलले संगठनात्मक संरचनासम्बन्धी विवरण स्थायी कमिटीमा पेश गर्ने र आवश्यक छलफल गरी पारित गर्ने कार्यसूची छ ।

नियमावलीको मस्यौदा स्थायी कमिटी सदस्यहरुलाई दिइसकिएको छ । उनीहरुलाई आवश्यक सुझावसहित बैठकमा उपस्थित हुन भनिएको केन्द्रीय सदस्य विष्णु रिजालले जानकारी दिए । बैठकका अरु पनि एजेण्डा तय भएको केन्द्रीय सदस्य रिजालले बताए । स्थायी कमिटीको पहिलो बैठकलाई दुवै अध्यक्षले सम्बोधन गर्नेछन् ।

नेकपाको ४५ सदस्यीय स्थायी कमिटी गठन भएपछि बस्न लागेको यो पहिलो बैठक हो । बैठकमा प्रधानमन्त्रीको आसन्न चीन भ्रमणाबारे पनि छलफल हुने नेताहरुले बताएका छन् । स्थायी कमिटी बैठकअघि ९ सदस्यीय केन्द्रीय सचिवालयको बैठक पनि बालुवाटारमै बस्नेछ ।

प्रकाशित समय १२:०६ बजे