राष्ट्रिय सभामा कांग्रेस सांसद राधेश्याम अधिकारीले अनसनरत डा. गोविन्द केसीको जीवन रक्षाको माग गर्दै जरुरी सार्वजनिक महत्वको प्रस्ताव दर्ता गरेका छन् । सांसद अधिकारीले संसद सचिवालयमा पेश गरेको प्रस्ताव मंगलबार दिउँसो ३ बजे बस्ने राष्ट्रिय सभा बैठकमा प्रस्तुत गर्ने कार्यसूची रहेको छ ।

प्रनितिधी सभामा डा. केसीको जीवन रक्षाको माग गर्दै सार्वजनिक महत्वको प्रस्ताव प्रस्तुत गरेको भोलीपल्टै मंगलबार राष्ट्रिय सभामा पनि उक्त प्रस्ताव दर्ता भएको हो ।

संघीय संसद सचिवालयका महासविच मनोहरप्रसाद भट्टराईका अनुसार मंगलबार सार्वजनिक महत्वको प्रस्ताव प्रस्तुत गरिने कार्यसूचीमात्रै रहेको छ । कांग्रेस सांसद अधिकारीले दर्ता गरेको प्रस्तावमा कांग्रेस सांसद अनिता देवकोटा र रमेशजंग रायमाझीले समर्थन गरेका छन् ।

प्रस्तावमा भनिएको छ, ‘जनताको प्रत्यक्ष सरोकार भएको स्वास्थ्य शिक्षा र सेवालाई सर्वसूलभ र गुणस्तरीय बनाउन जारी भएको अध्यादेश अनुरुप नै ‘राष्ट्रिय चिकित्सा शिक्षा विधेयक, २०७५’ तत्काल सदन समक्ष प्रस्तुत गर्न र अनसनरत डा. गोविन्द केसीको स्वास्थ्य उपचारको उचित व्यवस्था गरी जीवन रक्षा गर्न सरकारले आवश्यक कार्य गरोस् ।’

प्रकाशित समय १४:०९ बजे