संघीय समाजवादी फोरम नेपालका कार्यवाहक अध्यक्ष राजेन्द्र श्रेष्ठले आफ्नो प्रदेशभित्र शान्ति सुरक्षाको प्रत्याभूति दिने पहिलो जिम्मेवारी प्रदेश सरकारको हुने बताएका छन् ।

रिपोर्टर्स क्लबमा शुक्रबार आयोजित साक्षात्कारमा श्रेष्ठले तीन वर्षमा पनि केन्द्रीय सरकारले प्रदेश प्रहरीसम्बन्धी कानुन निर्माण नगरेकाले केन्द्र र प्रदेश सरकारबीच द्वन्द्व बढेको बताए ।

उनले प्रदेशले बनाएको कानुन संविधानसँग बाझिएको भए खारेज हुने र बाझिएन भने कार्यान्वयन हुने स्पष्ट पारे । श्रेष्ठले प्रदेशको कानुन निर्माण गर्न निकै ढिला भएकाले प्रदेश सरकारले धमाधम कानुन निर्माण गर्नुपरेको दावी गरे ।

नेकपाका नेता सत्यनारायण मण्डलले प्रतिपक्षको हैसियतले संघीय समाजवादी फोरम र राजपाको संयुक्त सरकारलाई विश्वासको मत दिएर साथ दिँदै आएको जानकारी दिए । लामो समयदेखि अस्थिर र अशान्त रहेको मधेशलाई स्थायित्व दिन पनि आफूहरुले प्रदेश सरकारलाई सहयोग गरेको उनको भनाइ थियो ।

नेपाली कांग्रेसका नेता रमेश लेखकले प्रदेशको पनि प्रदेश प्रहरी हुनुपर्नेमा जोड दिँदै प्रदेशभित्र शान्ति सुरक्षा दिने पहिलो दायित्व प्रदेश सरकारको हुने बताए ।

उनले संघीय सरकार संघीयता विरोधी मानसिकता भएको आरोप लगाउँदै तीन वर्षसम्म पनि नेपाल प्रहरी ऐन संशोधन नगरिएको र संघीय कानुन समयमै नबइएकाले यो द्वन्द्व सिर्जना भएको विचार व्यक्त गरे ।

अर्को प्रसंगमा लेखकले कांग्रेसको विधान मस्यौदा अन्तिम चरणमा पुगेको र केही दिनमा नै विधानलाई केन्द्रीय कार्यसमितिमा पेश गरिने जानकारी दिए । रासस ।

प्रकाशित समय १८:५६ बजे