राजपाको केन्द्रीय सदस्य मौलेश्वर कुमारसिंह राजपुतले भारतीय एक नागरिकलाई दिइएको नेपाली नागरिकता खारेज गर्न माग गरेका छन् । आइतबार काठामाडौंमा पत्रकार सम्मेलन गरेर उनले भारतीय नागरिक निरञ्जन कुमार अग्रवाललाई जन्मको आधारमा नागरिकता दिएको भन्दै उनले खारेज गर्न माग गरेका हुन् ।

पर्साको विरगन्ज १३ बाट जन्मको आधारमा नेपाली नागरिकता लिएको भन्दै नेता राजपुतले उक्त नागरिकता खारेज गरी दोषीलाई कारबाही गर्न माग गरेका छन् । जिल्ला प्रशासन कार्यालय पर्साले अग्रवाललाई नेपाली नागरिकता दिएको थियो ।उनले २०६३ सालपछि अनाधिकृत रुपमा भारतीय नागरिकलाई नेपाली नागरिकता दिएकोले सो विषयमा छानबिन गर्न समेत उनले माग गरे ।

‘२०६३ पछि देशमा नागरिकता प्रदान गर्ने प्रक्रिया नै गलत भएको छ, तीन जनाको सिफारिस र पाँच जनाको सर्जमीन गरेर नागरिकता दिने प्रावधान गलत छ, यसलाई सच्याउनु पर्छ’ उनले भने ।विरगन्जमा व्यापार व्यवसाय गरिरहेका निरञ्जनलाई शक्तिको आडमा नेपाली नागरिकता दिएको उनले आरोप लगाए ।

तर, अग्रवालले भने राजपुतको आरोपमा सत्यता नभएको बताएका छन् । राजपुतले सार्वजनिक गरेको सवारी चालक लाइसेन्समा उल्लेख गरिएको फोन नम्बर तथा जन्म मिति आफ्नो नभएको उनले दाबी गरे । सो विषयमा पहिले पनि अदालतमा मुद्दा परेकामा आफूले जितेको बताउँदै उनले मौलेश्वरले दिएको प्रमाणमा इन्डिया भन्ने शब्द उनी आफंैले थपेको अग्रवालले बताए ।

प्रकाशित समय १६:१५ बजे