नेपाली कांग्रेसको केन्द्रीय समितिको बैठकमा पार्टी विधान मस्यौदा समितिले विधान पेश गर्ने कार्यसूची तय भएको छ । मंगलबार बस्ने बैठकमा विधान पेश गर्ने र पाँच दिन केन्द्रीय सदस्यलाई अध्ययनका लागि समय दिइनेछ ।

महासमितिको बैठक सार्नेबारे छलफलका लागि बोलाइएको केन्द्रीय समितिको बैठकमा अरु विषयमा समेत छलफल हुने छ । पार्टी प्रवक्ता विश्वप्रकाश शर्माका अनुसार विधान मस्यौदा समितिले विधानलाई अन्तिम रुप दिए मंगलबारको बैठकमा पशे गर्ने छ ।

मंसिर ५ देखि ९ सम्म हुने भनिएको बैठक सार्नेबारे नेताहरुबीच अनौपचारिक छलफल भइरहेको छ । विधानमाथिकै छलफलका लागि केन्द्रीय समितिमा कम्तीमा सात दिन लाग्ने अनुमान छ । मंसिरभित्रै महासमिति बैठक हुने गरी मंगलबार बैठकबाट नयाँ मिति तय हुने सम्भावना रहेको नेताहरुले बताएका छन् ।

महासमिति तयारीस्वरुप गठन भएको विभिन्न प्रस्ताव तयार गर्न बनाइएको समितिले पनि आफ्नो प्रतिवेदन तयार पारेको छैन । कांग्रेसले राजनीतिक प्रस्ताव तयारीका लागि उपसभापति विमलेन्द्र निधि, महामन्त्री डा.शशांक कोइरालको संयोजकत्वमा सांगठानिक, सहमहामन्त्री डा.प्रकाशशारण महतको संयोजकत्वमा आर्थिक प्रस्ताव समिति बनाएको छ । कांग्रेसभित्र विधानकै विषयमा शीर्ष तहमा मतैक्य हुन सकेको छैन ।

प्रकाशित समय १९:३६ बजे