नेत्रविक्रम चन्द विप्लव नेतृत्वको विप्लव समूहले शनिबार राजधानीमा गर्न लागेको आमसभालाई लक्षित गरेर प्रहरीले सुरक्षा व्यवस्था कडा पारेको छ । कानुनविपरीतका गतिविधि हुनसक्ने विश्लेषणसहित सुरक्षा निकायले उच्च सुरक्षा सतर्कता अपनाएका हुन् ।

घरेलु तथा अरु कुनै हातहतियार प्रयोग हुनसक्ने आशंकामा प्रहरीले उच्च निगरानी बढाएको छ । यसअघिका कार्यक्रममा सो समूहले कार्यक्रममा घरेलु हतियार प्रदर्शन र कम्ब्याट ड्रेस प्रदर्शन गर्ने गरेको थियो । यसपटक भने हातहतियार तथा कम्ब्याट ड्रेससहितको सहभागिता भएको पाइए प्रहरीले तत्काल नियन्त्रणमा लिने जनाइएको छ । त्यस्तै, नेपाल प्रहरी र सशस्त्र प्रहरीले गस्ती पनि बढाएको छ ।

पार्टी गठनको पाँच वर्षको अवसरमा गर्न लागिएको कार्यक्रमलार्ई लक्षित गरी चन्द समूहले कार्यक्रम तयारी गरिरहँदा केही दिनदेखि नै प्रहरीले निगरानी बढाएको थियो । काठमाडौं प्रहरी परिसर स्रोतका अनुसार केही दिनयता उपत्यका प्रवेश गर्ने नाकामा विशेष चेकजाँच र कडाइ गरिएको छ । तर, कानुनतः आमसभा भए कुनै अवरोध नहुने सुरक्षा स्रोतले जनाएको छ ।

पार्टी पुनर्गठन दिवसको सन्दर्भ पारेर विप्लव समूहले जनसभा आयोजना गरेको हो । यसअघि, नेत्रविक्रम चन्द ‘विप्लव’ले जनसभालाई सम्बोधन गर्ने बताइए पनि उनी भने सहभागी नहुने भएका छन् । अन्तिम घडीमा विप्लव सहभागी हुने कार्यक्रम स्थगित गरिए पनि कारण खुलाइएको छैन ।

विप्लवको अनुपस्थितिमा हुन लागेको सभालाई पार्टी प्रवक्ता एवं स्थायी कमिटी सदस्य प्रकाण्डलगायतका नेताले सम्बोधन गर्ने कार्यक्रम छ । नेकपा मालेका महासचिव सीपी मैनाली, नेकपा माओवादी केन्द्रका गोपाल किराँती र नेकपा अध्यक्ष ऋषि कट्टेललगायतलाई सभामा निम्तो दिइएको छ । जनसभाअघि विभिन्न स्थानबाट झाँकीसहितको र्याली निकाल्ने तयारी छ ।

प्रकाशित समय १२:२३ बजे