कैलालीको टीकापुर घटनाका मुख्य अभियुक्त भएको अभियोगमा पुर्पक्षका लागि थुनामा रहेका राजपा नेपालका नेता रेशम चौधरीले आज प्रतिनिधिसभाको सपथ लिने भएका छन् ।

संसदका प्रवक्ता रोजनाथ पाण्डेका अनुसार चौधरीको सपथ अब केही बेरमा सिंहदरबारस्थित संसद् सचिवालयमा हुनेछ । सभामुख कृष्णबहादुर महरासँग चौधरीले पद तथा गोपनीयताको सपथ लिनेछन् । चाैधरीलाइ जेलबाट सिंहदरबार पुर्याइएकाे छ ।

सरकारलाई समर्थन गरेको राजपा नेपालले चौधरीलाई सपथ ग्रहण नगराए समर्थन फिर्ता लिने चेतावनी दिँदै आएको थियो । चौधरी कैलाली क्षेत्र नम्बर १ बाट प्रतिनिधिसभा सदस्य निर्वाचित भएका थिए ।

निर्वाचनका समयमा भारतमा भूमिगत रहेका चौधरी विजयी भएपछि आफ्नो मुद्दाको प्रतिवाद गर्न कैलाली जिल्ला अदालत पुगेको बेला पक्राउ परेका थिए । कैलाली जिल्ला अदालतले चौधरीलाई पुर्पक्षका लागि थुनामा राख्न आदेश दिएको थियो ।

चौधरी हाल डिल्लीबजार कारागारमा छन् । सपथपछि उनलाई सांसद भवन लैजाने वा फेरि जेलमै लैजानेबारे भने खुलाइएको छैन । टीकापुर घटनामा प्रहरी वरिष्ठ उपरीक्षक लक्ष्मण न्यौपाने र एक नाबालकसहित आठजनाको हत्या भएको थियो ।

प्रकाशित समय ११:२६ बजे