नेपाली कांग्रेसका उपसभापति विमलेन्द्र निधिले वर्तमान सरकार शक्तिकेन्द्रिकरण गर्न लागेको आरोप लगाएका छन् । नेपाली कांग्रेस जनकपुरधाम उपमहानगरपालिकाको नगर सम्मेलनमा निधिले सरकारका ३ प्रमुख अंग व्यवस्थापिका, कार्यपालिका र न्यायपालिकामाथि हस्तक्षेप नगरी शक्तिपृथकीकरण गरिनुपर्नेमा सरकारले न्यायलयलाई कुण्ठित गर्दै शक्तिकेन्द्रिकरण गर्न लागेको दावि गरे ।

उनले प्रदेश र स्थानीय तहलाई संविधानले दिएको अधिकार अहिले पनि सरकारले सिंहदरबारमै सीमित राख्न चाहेको टिप्पणी गरे । देशमा संघियाताको अभ्यास भइरहँदा पनि एक वर्षको कार्यशैली देख्दा देश र जनताको भावना अनुसार सरकारले काम गर्न नसकेको उनको भनाइ थियो ।

सरकारविरूद्ध कडा रूपमा प्रस्तुत भएका निधिले सरकार संघियताविरोधी, लोकतन्त्रविरोधी, प्रदेशविरोधी, मधेशीविरोधी तथा जनविरोधी भएको टिप्पणी गरे । सरकारले दुई तिहाईको दम्भ देखाएको उनको आरोप थियो । ७ प्रदेशमध्ये ६ प्रदेशमा कम्युनिस्टहरुकै सरकार भए पनि आफ्नै पार्टी र नेताप्रति विश्वास नलागेर प्रदेशको अधिकार संघमै राख्न चाहेको उनको टिप्पणी थियो ।

सरकारले समृद्ध नेपाल सुखी नेपालको झुटो नारा ल्याएर देशलाई वर्वाद गर्न लागेको बताए । सरकारले वर्षौंदेखि विशेष सम्बन्ध रहेको भारत र मित्रवत सम्बन्ध रहेको चीन, पाकिस्तान, अमेरिका लगायतको देशसँगको सम्बन्ध बिगारेको उनको आरोप थियो ।

छिमेकी र विदेशी राष्ट्रसँग सम्बन्ध विगारेपछि नेपालमा लगानी गर्ने कहाँबाट आउने होला चिन्ता व्यक्त गर्दै नेता निधिले अहिलेसम्म जनतालेको मूल्यांकन गरी आउने चुनावमा कांग्रेसलाई सहयोग गर्न आग्रह गरे । उनले कांग्रेसले मात्र मुलुकको विकास गर्न सक्ने उल्लेख गरे ।

प्रदेश २ सरकारलाई सहयोग गरे पनि उल्टै कांग्रेसमाथि जाई लागेको भन्दै निधि प्रदेश-२का मुख्यमन्त्रीमाथि पनि खनिए । प्रदेश सरकारलाई अहिलेसम्म नेपाली कांग्रेसले सहयोग गर्दै आएको भए पनि प्रदेश सरकारले भने मधेशी जनताको भावनाअनुसार काम नगरेको बताए ।

प्रदेश सरकारलाई केन्द्रीय सरकारले अधिकारहरु प्रत्यायोजन नगरेका बेला प्रदेश २ सरकारले संसदमा ल्याएको प्रदेश प्रहरी विद्येयक र ऐनमा कांग्रेसले खुलेर सहयोग गरेको स्मरण गर्दै उनले कांग्रेस अर्थात आफूले तत्कालीन जनकपुर चुरोट कारखानाको भवन र जग्गा जोगाएर प्रदेश सरकारको लागि राखेको दावी गरे ।

प्रकाशित समय १७:४९ बजे