कास्की जिल्ला टेनिस संघले टेनिस खेलाडी स्व. सुरज नगरकोटीका परिवारलाई १२ लाख ८० हजार रूपैयाँ आर्थिक सहयोग प्रदान गरेको छ । नेपाल टेनिस संघका केन्द्रीय उपाध्यक्ष एवं जिल्ला टेनिस संघका निवर्तमान अध्यक्ष विनोद कायस्थले आज पोखरामा आयोजित कार्यक्रममा सो सहयोग रकम नगरकोटीका श्रीमती बबितालाई हस्तान्तरण गरेका हुन् ।

सहयोग रकममध्ये आठ लाख रूपैयाँ स्व. नगरकोटीका दुई वर्षीया छोरी शाकुराको अध्ययनलगायत अन्य खर्चका लागि बालिकाको नाममा बैंकको मुद्धति खातामा राखिएको छ । बाँकी एक लाख ५० हजार रूपैयाँ श्रीमती र एक लाख ५० हजार रूपैयाँ बुबा/आमा तथा बाँकी रकम किरिया खर्चका लागि प्रदान गरिएको संघका कोषाध्यक्ष राजु गुरुङले जानकारी दिए । संघका केन्द्रीय उपाध्यक्ष कायस्थले परिश्रमी र गौरव गर्न लायक खेलाडी गुमाउँदा दुःख लागेको बताउँदै स्व. नगरकोटीको छोरीलाई निःशुल्क अध्ययन अध्यापन गर्न संघले सहयोग गर्ने प्रतिबद्धता व्यक्त गरे ।

धादिङ त्रिपुरा सुन्दरी गाउँपालिका–५ सल्यानकोट घर भएका स्व. नगरकोटी पाँच वर्ष अघिदेखि पोखरामा रहेर टेनिस खेल तथा प्रशिक्षणमा आबद्ध थिए । गत असोज २२ गते फेवातालमा पौडी खेल्ने क्रममा डुबेर नगरकोटीको निधन भएको थियो ।

प्रकाशित समय ०६:५३ बजे