लियोनल मेसीबिनै मैदानमा उत्रिएको बार्सिलोनाले स्पेनिस ला लिगामा आफ्नो चीर प्रतिद्धन्दी रियाल मड्रिडलाई ५–१ गोलअन्तरले हराएको छ ।

घरेलु मैदान क्याम्प नोउमा भएको सिजनको पहिलो एल क्लासिकोमा बार्सिलोनाका फिलिप कोटिन्होले ११औं मिनेटमा गोलको खाता खोलेका थिए । ३०औं मिनेटमा लुइस स्वारेजले पेनाल्टी मार्फत गोल गरे । रियालका राफेलले स्वारेजलाई डी बक्स एरियामा तानेर लडाएपछि भिडियो असिस्टेन्ट रेफ्री ‘भार’ को मद्दतमा बार्सिलोनालाई अग्रता दोब्बर बनाउने मौका मिलेको थियो । एल क्लासिकोमा भार पहिलो पटक प्रयोग भएको हो ।

पहिलो हाफमा नै दुई गोल खाएपछि रियाल दबाबमा आएको थियो । दोस्राे हाफको सुरुवातमा भने रियाल आक्रमक रुपमा प्रस्तुत भयो । ५०औं मिनेटमा मार्सेलोले गोल गर्दै खेल २–१ को आवस्थामा पुर्याए ।

खेलमा फर्किने प्रयास गरेको रियालले आफ्नो लय कायम राख्न सकेन । ७५औं मिनेटमा स्वारेजले गोल गरे । स्वारेजको यो गोल व्यक्तिगत दोस्रो तथा बार्सिलोनाका लागि तेस्रो थियो । ८३औं मिनेटमा स्वारेजले ह्याट्रिक पूरा गरे । सर्जियो रोबर्टोको पासमा स्वारेजेल ह्याट्रिक पूरा गरेका थिए ।

अटुरो भिडालले ८८ औँ मिनेटमा गोल गर्दै बार्सिलोनालाई रियलमाथि ५–१ को जित दर्ता गराए ।
लियोनल मेसी घाइते छन् भने क्रिष्टियानो रोनाल्डो यसै सिजन सिरी ए खेल्न युेभन्टसमा आवद्ध भएका छन् ।

जीतसँगै बार्सिलोना ला लिगाको शीर्ष स्थानमा उक्लिएको छ । १० खेल खेलेको उसको २१ अंक छ । अलाभेसको २० अंक छ भने तेस्रो र चौथो स्थानका सेभिल्ला र एथ्लेटिको मड्रिडको समान १९ अंक छ । १० खेल नै खेलेको रियाल मड्रिड भने १४ अंकसहित तालिकाको ९औं स्थानमा छ ।

प्रकाशित समय ०७:४९ बजे