मुलुकका विभिन्न स्थानमा हिंसात्मक गतिविधी गर्दै आएको नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीका नेतालाई प्रहरीले खोजीको सूचीमा रोखेको छ । विभिन्न भागमा बम पड्काएर सर्वसाधारणलाई आतंकित पार्ने तथा ज्यान समेत लिने गतिविधी बढाएसँगै सुरक्षा निकायले विप्लप समुहका नेता कार्यकर्ताको खोजी तीव्र पारेको हो ।

ललितपुरमा रहेको एनसेलको कार्यालयमा बम विस्फोटपछि आलोचित सुरक्षा संयन्त्रले आफ्ना जासुस परिचालन गरी विप्लवलगायत सो दलका अन्य नेता कार्यकर्ता रहेको स्थानबारेमा गुप्त सूचना संकलन गरिरहेका छन् ।

विप्लव समूहका प्राय : सबै नेता काठमाडौ भन्दा देशका विभिन्न भागमा घुमिरहेका सुरक्षा निकायले जनाएको छ । देशव्यापी रुपमा संगठन निर्माण र आवश्यक रणनीति तयार गर्न उनीहरु केन्द्रित रहेको सुरक्षा निकायको विश्लेषण छ । नेतृत्वकर्ता विप्लव, खड्गबहादुर विश्वकर्मा, धर्मेन्द्र बास्तोला भूमीगत रुपमै रहेको जनाईएको छ । यस्तै अनिल शर्मा, हेमन्तप्रकाश ओली र उमा भुजेल विभिन्न जिल्ला जिल्ला घुमिरहेका जनाइएको छ ।

उच्च सुरक्षा स्रोतले भन्यो
‘संगठनका नेतृत्वकर्तादेखि कार्यकर्तासम्मलाई निगरानीमा छन् । आम सर्वसाधारणलाई थप आतकित पार्ने क्रियाकलाप गर्ने अनुमानसहित उनीहरुको गतिविधीलाई नजीकबाट नियालीरहेका छौं । ’ विप्लव समुहका विबिध गतिविधिबारे प्रहरी जानकार रहेको नेपाल प्रहरीले जनाएको छ । संविधान प्रदत्त अधिकारअनुसार कार्यक्रम सञ्चालन गर्न दिने तर आपराधिक क्रियाकपाललाई निरुत्साहित गर्ने प्रहरी प्रवक्ता उत्तम सुवेदीले जनाए ।

उनले कानुनविपरीत गतिविधि गर्नेलाई कानुनले नछाड्ने बताए । ‘आपराधिक गतिविधिमा संलग्न भएकाको खोजी भइरहेको छ । को कहाँ कसरी संलग्न भएका हुन, प्रहरीले पहिचान गरेकाले उनीहरुको खोजीमा लागेका छौं’, सुवेदीले भने ।  ललितपुर बम विस्फोट र अन्य घटनामा संलग्न रहेकाहरु मध्ये केहीलाई पक्राउ गरिएको र संलग्न बाँकीलाई खोज्ने काम भईरहेको जनाईएको छ । त्यसै अनुसार कसलाई कुन मुद्दा लगाउने भन्ने निर्धारण हुने प्रहरीले जनाएको छ ।

फागुन १० गतेको सो ललितपुर एनसेल बमकाण्डमा सिमप्रसाद गुरुङको मृत्यु भएको थियो । विप्लव समूहका युवा फाँटका सदस्य एवं विप्लवका पूर्व अंगरक्षक सूर्य भुजेललाई पक्राउ गरिएको छ । काठमाडौं र अन्य स्थानबाट करिब ४० जना पक्राउ परेका छन् । उनीहरुसँग आवश्यक बयान लिने काम भइरहेको जनाईएको छ ।

केही महिनाअघि सरकारले आन्दोलनरत पक्षसँग वार्ता गठन एक समिति गठन गरेको थियो । वार्ता टोलीले विप्लपसंग वार्ताको लागी पत्राचार गर्दा उसले आफू राजनीतिक दल भएकोले वार्ता नगर्ने जनाएको थियो । पछि सोमप्रसाद पाण्डे नेतृत्वको वार्ताटोलीले सरकारलाई बुझाएको प्रतिवेदनमा विप्लव समूह राजनीतिक भएकाले समस्याको समाधान राजनीतिक तहबाट गर्नुपर्ने जनाएको थियो ।

प्रकाशित समय १२:०० बजे