नेत्रविक्रम चन्द (विप्लव)ले नेतृत्व गरेको पार्टीलाइ प्रतिबन्ध लगाएसँगै सरकार झन कडा रूपमा प्रस्तुत भएको छ । गृहमन्त्रालयले एक सूचना गरेर विप्लवका पार्टीलाई  सहयोग गर्ने, चन्दा दिनेलाई समेत कारबाही गर्ने चेतावनी दिएको छ । मन्त्रालयले विप्लव समूहको धाकधम्की र प्रलोभनमा नपर्न आग्रह गरेको  हो ।

यसैबीच विप्लवले सरकारविरुद्ध आन्दोलनका घोषणा गर्दै लगानी  सम्मेलन प्रभावित हुने गरी बन्द आह्वान गरिएपछि उपत्यकाभित्र सुरक्षा सतर्कता बढाइएको छ । उपत्यकाका सम्भावित विप्लव कार्यकर्ता बस्ने क्षेत्रहरू, कपन, कीर्तिपुर, गोंगबु, नयाँ बजार, सातदोबाटोलगायतका क्षेत्रमा व्यापक रूपमा सुरक्षाकर्मी परिचालित गरी ‘सर्च एन्ड सिज’ अभियान चलाइएको सुरक्षा स्रोतले बतायो ।

यसअन्तर्गत शंकास्पद गतिविधि देखाउने जोकोहीलाई पनि सुरक्षाकर्मीले पक्राउ गर्ने अधिकार दिइएको छ । प्रहरीले अहिले देशभर विप्लवका नेता–कार्यकर्ता रहने सम्भावित स्थानमा छापासमेत मार्ने गरेको छ । विप्लवको गतिविधि निस्तेज गर्न प्रहरीले आवश्यकताअनुसार नियन्त्रित अनुसन्धान प्रविधि (कन्ट्रोल डेलीभरी) र गुप्त कार्बाही (अन्डर कभर अपरेसन) पद्धतिबाट अपरेसन चलाइरहेको छ । सुरक्षाकर्मीहरूलाइ घुँडामुनि गोली हान्ने अधिकारसमेत दिइसकिएको छ । उपत्यका बाहिर पनि विप्लवका आधार इलाका मानिएका पहाडी जिल्लाहरूमा सरकारको निर्देशनमा मुलुकका चारवटै सुरक्षा निकायले निगरानी बढाएका छन् ।

अहिलेसम्म करिब ३०० जना विप्लव  समूहका उच्चस्तरका नेता तथा कार्यकर्ता पक्राउ परिसकेका छन् । प्रहरीले पक्राउ गरेपछि विप्लव समूहका अधिकांश नेतामात्रै नभएर भात्रृ संगठनका नेतासमेत भूमिगत भइसकेका छन्। प्रहरीले अत्याधुनिक प्रविधिबाट फेसबुकबाट लोकेसन ट्रयाक गर्न थालेपछि विप्लवसँग सम्बद्ध नेताहरूले फेसबुकसमेत डिएक्टिभेट गर्न थालेका छन् । प्रहरीका अनुसार विप्लव समूहका सबैजसो नेताहरूको मोबाइल अफ छ, मोबाइलबाट समेत प्रहरीले स्थान पहिचान गरेर पक्राउ गर्ने क्रम बढेपछि उनीहरूले नयाँ नम्बर प्रयोग गर्न थालेका छन् ।

प्रकाशित समय १२:०८ बजे