नेपालले चालू आर्थिक वर्षको पहिलो १० महिनामा पर्यटन क्षेत्रबाट ६३ अर्ब २७ करोड रुपैयाँ आर्जन गर्दा नेपालीहरूले विदेशमा घुमेरै ७३ अर्ब ६५ करोड रुपैयाँ खर्च गरेका छन् ।
नेपाल राष्ट्र बैंकद्वारा जारी चालू आर्थिक वर्षको पहिलो १० महिनाको तथ्यांकअनुसार नेपालीहरूले घुमफिरमा ७३ अर्ब ६५ करोड २४ लाख रुपैयाँबराबर ६४ करोड ९८ लाख अमेरिकी डलर खर्च गरेका हुन् ।

गत आर्थिक वर्षभरिमा नेपालीहरूले घुमफिरमा ७९ अर्ब ५९ करोड रुपैयाँ खर्च गरेका थिए भने गत वर्ष पर्यटनबाट देशले भने जम्मा ६९ अर्ब ७५ करोड रुपैयाँमात्र कमाएको थियो । नेपालीहरूको आयमा भएको वृद्धिसँगै घुमफिरमा हुने खर्च पनि बढ्दै गएको हो ।

सन् २०१९ को जनवरीदेखि अप्रिलसम्म करिब ११ लाख नेपाली विदेशिएका छन्, तीमध्ये वैदेशिक रोजगारीमा गएका करिब २ लाख नेपालीको संख्या घटाउँदा झन्डै ९ लाख नेपाली विदेश यात्रामा निस्किएको अध्यागमन विभागको तथ्यांकले देखाउँछ ।

यो तथ्यांकमा घुमफिरका लागि भारतका दार्जिलिङ, सिक्किम, नैनितालदेखि धार्मिक पर्यटनका लागि चार धाम जाने नेपालीहरूको संख्या जोडिएको छैन । झन्डै ५ देखि ८ लाख नेपालीहरू भ्रमणका लागि भारत जाने गरेको पर्यटन व्यवसायीहरू बताउँछन् ।

पछिल्लो समयमा नेपालीहरू विदा मनाउनका लागि थाइल्यान्ड, भियतानमदेखि अन्य एसियाली गन्तव्यहरूमा जाने क्रम बढेको छ । विभिन्न ट्राभल एजेन्सी कम्पनीहरूले सस्ता भ्रमणका प्याकेजहरू ल्याउन थालेपछि नेपालीहरूको घुम्न संस्कार बढेको हो । केही कम्पनीहरूले समूहमा नै घुमाउन लाने गरेका छन् भने केहीले उपहारमा समेत घुमफिरका प्याकेज राख्ने गरेका छन्।

प्रकाशित समय १६:१७ बजे