नेपाल ब्रोकर एसोसिएसनले वाणिज्य बैंकलाई सहायक कम्पनी खोलेर धितोपत्र दलाल व्यवसाय गर्न दिँदा सूचना बेचिने गम्भीर आरोप लगाएको छ । पुँजीबजार तथा मुद्राबजारसम्बन्धी अध्ययन उपसमितिसँगको छलफलका क्रममा एसोसिएसनले धितोपत्रको दोस्रो बजारमा जोखिम धेरै भएकाले अनुभव नभएका वाणिज्य बैंकलाई धितोपत्र दलाल व्यवसाय गर्न दिँदा जोखिम बढ्ने र सूचना बेचिने आरोप लगाएका हुन् ।

नेपाल बैंकर संघले भने पारदर्शिता र नीतिनियमको पालनामा बैंकिङ क्षेत्र सबैभन्दा अगाडि रहेकाले बैंकमा हुने गरेका अन्य कारोबारसरह धितोपत्र कारोबारसम्बन्धी कुनै पनि सूचना तथा विवरणहरु गोप्य रहने र धितोपत्र कारोबार भए पनि नभए पनि कर्मचारीलाई व्यक्तिगत लाभ नहुने भएकाले सुशासनमा बढी विश्वस्त हुन सकिने साथै बैंक तथा वित्तीय संस्थामा संस्थागत सुशासन रहेकाले इन्साडर ट्रेडिङ नहुने बताएका छन् ।

त्यस्तै बैंकहरूले इथिकल इस्ट्यान्डर्ड मिट नगर्ने ब्रोकर एसोसिएसनको आरोप छ । बैंकर एसोसिएसनले भने अन्तर्राष्ट्रिय रुपमा गरिने क्यामेल्स रेटिङमा पनि दक्षिण एसियामै नेपालका बैंक अग्र स्थानामा रहेको र मुलुकको अर्थतन्त्रमा बैंकिङ क्षेत्रको भूमिका र डुइङ बिजनेस इन्डेक्समा वित्तीय क्षेत्रको र्‍याङकिङलाई हेर्दा बैंकहरुको स्तर निकै माथि रहेको बताएको छ ।

यस्ता छन् आरोप ?

१. बैंकहरूमा सूचना कारोबार हुने ठाउँ र सूचना पहुँच हुने ठाउँ एउटै हुने भएकाले सूचना बेचिने र जनताको पैसा क्षयीकरण हुन्छ । जनता घाटामा जान्छन् ।

२. बैंकका सहायक कम्पनीलाई ब्रोकर लाइसेन्स दिँदा इनसाइडर ट्रेडिङ बढ्छ ।

३. बैंकले आफ्ना प्रडक्टलाई सेयरसँग टाइअप गर्ने र डिपोजिटलाई सेयरमा डाइभर्ट गर्न सक्छन् ।

४. बैंकहरूले धितोपत्र दलालको इथिकल स्ट्यान्डर्ड मिट गर्दैनन् ।

५. बैंकसँग ब्रोकर चलाउन अनुभव र जनशक्ति दुवै छैन ।

६. बैंक सञ्चालकले अवैध रूपमा आर्जित सम्पत्ति बैंकमार्फत छिराएर आफू नियन्त्रित सहायक कम्पनीबाट सेयरमा लगानी गरेर शुद्धीकरण गर्छन् ।

७. बैंकहरूमा कर्पोरेट कल्चर छैन । निश्चित समूह र घरानाबाट सञ्चालित छन् । व्यापारी, व्यवसायी, उद्यमी बैंकर एउटै छन् ।

८. बंगलादेशमा बैंकहरूलाई ब्रोकर लाइसेन्स दिएपछि साना लगानीकर्ताले आत्महत्या गर्ने तथा पारिवारिक बिच्छेद हुनेसम्मका अवस्था आएपछि हटाइएको ।

वाणिज्य बैंकका प्रमुख कार्यकारी अधिकृत (सिइओ)हरूको संस्था बैंकर एसोसिएसनले भने देशभरका ७४३ स्थानीय तहमा वाणिज्य बैंकका शाखा स्थापना भइसकेकाले बैंकहरुलाई धितोपत्रको ब्रोकर लाइसेन्स प्राप्त भएमा दूरदजारमा रहेका प्रत्येक नागरिकले सहज र सुलभ रुपमा धितोपत्र कारोबार गर्न सक्ने, बैंकमा दक्ष कर्मचारी रहेकाले ग्राहकलाई आवश्यक सूचना तथा जोखिमका बारेमा सही जानकारी दिन सक्ने, बैंकहरुले धितोपत्र ब्रोकरका रुपमा काम गर्दै आएको अन्तर्राष्ट्रिय अभ्यास रहेको र वाणिज्य बैंकमा कर्मचारी पर्याप्त रहेकाले धितोपत्र कारोबार सेवा थप गर्दा कुनै पनि भार नपर्ने र भएका जनशक्ति र व्यवस्थापनबाटै तत्काल यो सुविधा स्थानीय तहसम्म पुर्‍याउन सकिने दलिल पेस गरेका थिए ।

सांसद रामकुमारी झाँक्री संयोजक रहेको उपसमितिले भने बैंकलाई ब्रोकर लाइसेन्स दिने सकिने प्रतिवेदन तयार गरी अर्थ समितिमा बुझाइसकेको छ ।

प्रकाशित समय १४:५२ बजे