पुँजीको आधारमा नेपालकै सबैभन्दा ठूलो वाणिज्य बैंक ग्लोबल आइएमई बैंकका प्रमुख कार्यकारी अधिकृत (सीईओ) परशुराम कुँवर क्षेत्रीको राजीनामा स्वीकृत भएको छ । कार्यकाल बाँकी रहँदै क्षेत्रीले गत असार १ गते राजीनामा बुझाएका थिए ।

स्वास्थ्यको कारण  जनाउँदै उनले बुझाएको राजीनामा साउन १ देखि लागू हुनेगरी सञ्चालक समितिले बिहीबार स्वीकृत गरेको हो । ग्लोबल आइएमई बैंक र जनता बैंक मर्जर भएपछि उनी गत मंसिर २० गतेदेखि सीईओ बनेका थिए । मर्जरअघि उनी जनता बैंककोको सीईओ थिए ।

बैंकले डेपुटी सीईओ महेश ढकाललाई कायम मुकायमको जिम्मेवारी दिएको छ ।

राजीनामा स्वीकृत भएपछि क्षेत्रीले फेसबुकमा स्टाटस लेख्दै ‘जीवनको अर्को महत्वपूर्ण र अविस्मरणीय दिन’ भएको उल्लेख गरेका छन् ।

प्रकाशित समय १७:१६ बजे