अख्तियार दुरुपयोग अनुसन्धान आयोगले आर्थिक अपचलनको आरोपमा एकै महिनामा २५ जनालाई नियन्त्रणमा लिएको छ । चालू आर्थिक वर्षको पहिलो महिनामा एक हजार ४९४ उजुरी परेकोमा अख्तियारले एक करोड ८७ लाख ५९ हजार ९५ रुपैयाँबराबर अवैध रकमसहित उनीहरुलाई नियन्त्रणमा लिएको हो ।

पक्राउ पर्नेहरुमा इन्जिनियरदेखि कार्यालय सहयोगीसम्म छन् । संख्यात्मक आधारमा स्थानीय तहका कर्मचारी बढी अख्तियारको फन्दामा परेका छन् ।

को‑को परे पक्राउ ?

अख्तियारले साउनमा नियन्त्रणमा लिएकामध्ये नेपाल विद्युत प्राधिकरण ढल्केबर ग्रिड शाखा धनुषाका कार्यालय प्रमुख उप्रबन्धक रितेश गुप्ता सबैभन्दा बढी घुस लिने आरोपी हुन् । उनी एक करोड २४ लाख ९१ हजार १४५ रुपैयाँबराबरको हस्तक्षरित चेकसहित पक्राउ परेका छन् । भुक्तानीका लागि आवश्यक पर्ने कागजात स्वीकृत नहुँदै कार्यालयअन्तर्गत सञ्चालित विभिन्न योजनाको भुक्तानी दिन भन्दै उनले पहिला नै चेक काटेको अख्तियारको आरोप छ । दोस्रोमा भेरी अस्पताल बाँकेका कम्प्युटर अपरेटर अरुणराज खनाल स्रोत नखुलेको १६ लाख १३ हजार ९७५ रुपैयाँसहित पक्राउ परेका छन् ।

यस्तै इटहरी उपमहानगरपालिका सुनसरीमा कार्यारत लेखा अधिकृत विकास पोखेरल ६५ हजार घुस रकमसहित पक्राउ परेका छन् । पोखरेलले नगरपालिकाको शिक्षा शाखाबाट कक्षा ८ को परीक्षा सञ्चालनमा भएको खर्चको फरफारक गरी भुक्तानी गर्न सेवाग्राहीसँग घुस लिएको अख्तियारले जनाएको छ । उनी साउन १ गते पक्राउ गरेका हुन् । जलस्रोत तथा सिँचाइ डिभिजन कार्यालय कलैयामा कार्यरत सबइन्जिनियर गजेन्द्रप्रसाद जैसवाल र चन्दन जैसवाललाई अख्तियारले साउन ४ गते नियन्त्रणमा लिएको छ । नदी तटबन्धको जाली लगाउने काम सम्पन्नपछि रकम भुक्तानी गरेबापत उनले सेवाग्राहीसँग ८० हजार घुस मागेका थिए ।

यसैगरी साउन ५ गते ललितपुरको गोदावरी नगरपालिकामा कार्यरत प्रमुख प्रशासकीय अधिकृत कृष्णप्रसाद जैशी र सबइन्जिनियर किशोरकुमार मोक्तान अख्तियारको नियन्त्रणमा परेका छन् । उनीहरु निर्माणाधीन आयोजनाको बिल भुक्तानीका क्रममा सेवाग्राहीसँग डेढ लाखबराबर घुससहित पक्राउ परेका हुन् ।

अख्तियारले साउन ७ गते चुरे गाउँपालिका घरखेडाका कर्मचारी सबइन्जिनियर चन्द्रदेव भट्टलाई २० हजार घुससहित पक्राउ गरेका छ । उनले सडकको इस्टिमेन्ट नापजाँच तथा मूल्यांकन गरिदिएबापत सेवाग्राहीसँग घुस लिएका थिए । डिभिजन वन कार्यालय सुनसरीका डिभिजन प्रमुख रामबाबु शाह र उनकी श्रीमती किरण शाहलाई अख्तियारले स्रोत नखुलेको ५ लाख ५३ हजार रकमसहित पक्राउ गरेको छ ।

यसैगरी लमजुङको मर्स्याङ्दी गाउँपालिकाका इन्जिनियर भुपेन्द्रकुमार मण्डल र सबइन्जिनियर टीकाप्रसाद गुरुङ तथा गौतम बुद्ध अन्तर्राष्ट्रिय विमानस्थल भैरहवाका कार्यालय सहयोगी (चेन म्यान) विश्वनाथप्रसाद लोध र मतियार महेन्द्रप्रसाद यादवलाई अख्तियारले नियन्त्रणमा लिएको छ ।

दाङको तुलसीपुर उपमहानगरपालिका प्रमुख प्रशासकीय अधिकृत कृष्णकान्त उपाध्याय, बाँके राष्ट्रिय निकुञ्जका प्रमुख संरक्षण अधिकृत प्रमोद भट्टराई र सहायक संरक्षण अधिकृत विष्णु रोकाय, राजस्व अनुसन्धान कार्यालय बुटवलका प्रमुख अनुसन्धान अधिकृत विजय राना र व्यवसायी अनिलकुमार झा पनि अख्तियारको फन्दामा परेका छन् ।

यस्तै नेपाल खानेपानी संस्थान बुटवलका इन्जिनियर सन्तोष शाह साउन २६ गते र उदयपुरको मैनामनीस्थित सबडिभिजन वन कार्यालयका सहायक वन अधिकृत शिवनारायण यादवसहित ६ जना पक्राउ परेका छन् । शाह स्रोत नखुलेको ८ लाख २२ हजार रकमसहित पक्राउ परेका हुन् । शिवनारायणसहित सब-डिभिजन वन कार्यालय लालबजार रामपुर उदयपुरका प्रमुख (सहायक वन अधिकृत) विनोदकुमार साह, फोरेस्टर रमेश राई, सब-डिभिजन वन कार्यालय मैनामैनी उदयपुरमा कार्यरत फोरेस्टर विशेश्वर चौधरी, वनरक्षकहरू शैलेन्द्र झा र मनोजकुमार राउत गरी ६ जनालाई १७ हजारबराबर घुस लिएको अख्तियारले जनाएको छ ।

कति जनालाई चलाइयो मुद्दा ?

अख्तियारले सिद्धराज जोशी, चन्द्रदेव भट्ट, इन्जिनियर भुपेन्द्रकुमार मण्डल, सबइन्जिनियर टिकाप्रसाद गुरुङ, गोविन्द शाह, समीर भण्डारी, कृष्णबल्लभ ठाकुर, सबइन्जिनियरहरु रञ्जितकुमार श्रेष्ठ र विरेन्द्र चन्द, नारायणकाजी श्रेष्ठ, सहायक प्रहरी निरीक्षक रामविश्वासराय यादवविरुद्ध पनि विशेष अदालत काठमाडौँमा मुद्दा दायर गरेको छ ।

अख्तियारका अनुसार विकास पोखरेल, इन्जिनियर मिलन अधिकारी, हुकुमबहादुर ओलीविरुद्ध पनि मुद्दा दायर भएको छ । यस्तै कल्याणपुर नगरपालिका प्रमुख सूर्यनाथ मण्डल, चन्द्रदेव भट्ट र शिक्षक मिरा रानाविरुद्ध मुद्दा पनि मुद्दा दायर भइसकेको अख्तियारका प्रवक्ता तारानाथ अधिकारीले जानकारी दिए ।

साउनमा सबैभन्दा बढी ५०६ वटा लिखित उजुरी परेका छन् । त्यस्तै हुलाकबाट २७२, इमेलबाट ३३३, वेबसाइटबाट १७३, टेलिफोनबाट १२१, फेसबुकबाट ३७, मोबाइल एपबाट २५, पत्रपत्रिका २३, फ्याक्सबाट दुुई र भाइबरबाट दुईवटा उजुरी परेको अख्तियारले जनाएको छ ।

प्रकाशित समय ११:५१ बजे