एनएमबी बैंकले कञ्चन डेभलपमेन्ट बैंकलाई प्राप्ति गरी एकीकृत कारोबार सुरु गरेको छ । आइतबारबाट एकीकृत वित्तीय कारोबार सुरु गरेसँगै एनएमबी बैंकको चुक्ता पुँजी १४ अर्ब ४५ करोड तथा जगेडा कोषको आकार ७ अर्ब ३५ करोड पुगेको छ ।

एकीकृत वित्तीय कारोबारको थालनीसँगै एनएमबी बैंकका सबै प्रादेशिक संरचनामा सन्तुलित सञ्जालको विस्तार भई बैंकको ब्रान्डसमेत बलियो विश्वास गरिएको छ । यसले सहरोन्मुख र ग्रामीण क्षेत्रका जनतामा वित्तीय पहुँच पु‑याउने बैंकको दिगो लक्ष्य प्राप्त गर्न सरोकारवालासँगको सहकार्यलाई अघि बढाउन मद्दत पुग्ने बैंकका प्रमुख कार्यकारी अधिकृत सुनिल केसीले जानकारी दिए ।

एनएमबी बैंकमा Nederlandse Financierings-Maatschappij Voor Ontwikkelings landen N. V. (एफएमओ), कर्मचारी सञ्चय कोषलगायतका संस्थाहरुको पनि लगानी छ । एफएमओ नेदरल्यान्डस् अन्तर्राष्ट्रिय रुपमा राम्रो छवी भएको Standard & Poor’s तथा Fitch जस्ता संस्थाहरुले ए थ्री रेटिङ गरेको नेदरल्यान्डस् सरकारसमेतको लगानी रहेको अन्तर्राष्ट्रिय विकास बैंक हो ।

एफएमओसँगको गठबन्धनले बैंकलाई वातावरणीय र सामाजिक जोखिमहरू प्रबन्ध गर्न र नवीकरणीय ऊर्जा, साना तथा मझौला कर्जाहरु र कृषि व्यवसायमा प्रमुख संवाहकको रूपमा प्रस्तुत गर्न सघाउ पु‑याएको छ । एनएमबी बैंक बैंक अफ द इयर–२०१७ र बैंक अफ द इयर–२०१८ द्वारा लगातार पुरस्कृत भएको बैंक हो । कञ्चन डेभलपमेन्ट बैंकलाई प्राप्तिपश्चात् बैंकका १८६ शाखा, ६ विस्तारित काउन्टर र १३५ एटीएम पुगेका छन् ।

प्रकाशित समय ११:५८ बजे