विश्व अर्थतन्त्रको करिब एक तिहाइ हिस्सा ओगट्ने अमेरिका, ब्राजिल, भारत र रुसमा मात्रै कुल संक्रमितको ५७ प्रतिशतभन्दा बढी मानिस संक्रमित भएका छन् । मंगलबार बिहानको तथ्यांकअनुसार यी चार देशमा १ करोड ३६ लाख ७१ हजार मानिस संक्रमित भएका छन्, जुन कुल संक्रमितको ५७.४२ प्रतिशत हो ।

त्यस्तै यी देशमा ३ लाख ७१ हजार ५५९ जनाको कोरोना संक्रमणबाट मृत्यु भएको छ । यो पनि कुल मृतकको ४५.४८ प्रतिशत हो ।

लेखा परीक्षण, कर र आर्थिक सल्लाहहरु प्रदान गर्ने व्यावसायिक फर्महरूको विश्वव्यापी नेटवर्क केपिएमजीको अध्ययन प्रतिवेदनअनुसार कोरोनाबाट अमेरिकाका २५, ब्राजिलका १५, भारतका १३ र रुसका ४ प्रतिशत मानिस संक्रमित छन् । बाँकी विश्वभरका संक्रमित मानिस ४३ प्रतिशत छन् ।

त्यस्तै विश्व अर्थतन्त्रको करिब एक तिहाई हिस्सा यी देशले ओगटेका छन् । विश्व अर्थतन्त्रको २४ प्रतिशत अमेरिका, भारत ३ प्रतिशत तथा रुस र ब्राजिलले २‑२ प्रतिशत हिस्सा ओगट्छन् । बाँकी विश्वले ६८ प्रतिशत ओगट्छन् ।

तथ्यांकअनुसार अमेरिका र ब्राजिलमा कोरोना संक्रमित र मृत्यु वृद्धिदर घट्दै गर्दा भारतमा संक्रमित र मृत्युदर उच्च गतिमा बढिरहेको छ । अहिले भारतमा कोरोना संक्रमण वृद्धिदर प्रतिदिन ६२ हजारभन्दा धेरैले बढिरहेकत्र छ । यो संख्या प्रतिदिन विगतमा अमेरिकामा भएझैं ६६ हजार ३ सयभन्दा धेरैले बढ्न थालेमा भारतमा अमेरिकामा भन्दा धेरै मानिस संक्रमित हुनेछन् । अहिले अमेरिका र रुसमा संक्रमण वृद्धिदर सामान्य बन्दै जाँदा भारत र ब्राजिलमा उच्च नै छ ।

यी चार देशको विश्व अर्थतन्त्रमा रहेको प्रभाव र कोरोना संक्रमणको वृद्धिदरको नजिता सारा विश्वले जसरी भोग्छ, भारतमा भएको कोरोना वृद्धिदरको त्योभन्दा गहिरो प्रभाव नेपालमा पर्नेछ । अहिले मात्रै पनि भारतसँग वार्षिक करिब १० खर्बको र चालू आर्थिक वर्षको साउनको मात्र तथ्यांकअनुसार करिब ६३ अर्बको व्यापार गरिरहेको नेपालका लागि भारतमा उच्च दरमा संक्रमण फैलिनुले नेपाल धेरै प्रभावित हुने अर्थशास्त्रीहरू बताउँछन् ।

भारतमा संक्रमण फैलिँदै जाँदा नेपाल यसै पनि जोखिम सूचीमा पर्छ । भारतसँग खुला सीमा रहनु तथा व्यापार ठूलो मात्रामा हुनुले पनि जोखिम उच्च बनेर जानेछ । अहिले पनि भारतमा रहेका नेपाली र नेपालमा कार्यरत भारतीय लुकीछिपी फर्किएपछि नेपालमा कोरोना संक्रमण तीव्रगतिमा फैलिएको सरकारी संस्थाहरूले जनाएका छन् ।

अध्ययनअनुसार विश्वभर हस्पिटालिटी क्षेत्रको बेरोजगारी दर उच्च गतिमा बढ्नेछ । त्यस्तै खुद्रा व्यापार, वित्तीइ क्षेत्रको बेरोजगारी दर सामान्य गतिमा बढ्नेछ भने निर्माण क्षेत्रको बेरोजगारी दर खासै प्रभावित हुने छैन ।

कोभिड १९ ले वित्तीय क्षेत्रको विद्युतीय भुक्तानी र अनलाइन सपिङमा भने सकारात्मक प्रभाव परेको छ । मानिसहरू घरमै बसे विद्युतीय माध्यमबाट भुक्तानी गरेको तथा अनलाइन सपिङमार्फत सामान मगाएको अध्ययनले देखाएको छ ।

प्रकाशित समय १२:३९ बजे