रिलायन्स लाइफ इन्स्योरेन्सले चालू आर्थिक वर्षको पहिलो त्रैमासमा ४६ करोड ५२ लाख रुपैयाँ खुद बिमाशुल्क संकलन गरेको छ । यो बिमा शुल्क गत वर्षको सोही अवधिको तुलनामा २२ करोड २८ लाख रुपैयाँ अर्थात् ९१.९७ प्रतिशत बढी हो । गत वर्षको पहिलो त्रैमासमा कम्पनीले २४ करोड २३ लाख रुपैयाँ खुद बिमा शुल्क संकलन गरेको थियो ।

खुद बिमा शुल्कसँगै कम्पनीको खुद नाफा पनि बढेको छ । असोजसम्ममा कम्पनीले खुद नाफा ६२.४३ प्रतिशतले बढाएर ३ करोड ७३ हजार रुपैयाँ पुर्‍याएको छ । कम्पनीले गत वर्षको असोजसम्ममा एक करोड ८५ लाख रुपैयाँ खुद नाफा गरेको थियो ।

आईपीओ जारीपश्चात् २ अर्ब १० करोड रुपैयाँ चुक्ता पुँजी पुगेको कम्पनीको जगेडा कोषमा १७ करोड ३० लाख रुपैयाँ छ । त्यस्तै, गत आवको असोजसम्म ५३ करोड ५२ लाख रुपैयाँ रहेको जीवन बिमा कोषमा एक अर्ब ३९ करोड रुपैयाँ सञ्चित भएको छ । कम्पनीले महाविपत्ति कोष पनि बढाएर एक करोड ९२ लाख रुपैयाँ पुर्‍याएको छ । कम्पनीको प्रतिसेयर आम्दानी ५.७३ रुपैयाँ छ भने प्रतिसेयर नेटवर्थ १०९.१५ रुपैयाँ छ ।

रिलायन्स लाइफले हालसम्ममा ६६ हजार ११३ वटा बिमालेख जारी गरी ३ अर्ब ३३ करोड ७७ लाख रुपैयाँ कुल बिमा शुल्क आर्जन गरेको छ । असोज मसान्तसम्ममा १२ वटा दाबीबापत ६ करोड ६६ लाख ५३ हजार रुपैयाँ भुक्तानी गरिसकेको र चारवटा दाबीबापत ४७ लाख ५० हजार रुपैयाँ भुक्तानी हुन बाँकी रहेको कम्पनीले सार्वजनिक गरेको वित्तीय विवरणमा उल्लेख छ ।

प्रकाशित समय १३:१३ बजे