निर्जीवन बिमा कम्पनीमध्येकै अग्रणी शिखर इन्स्योरेन्सले ‘शिखर अटो प्लस इन्स्योरेन्स’ पोलिसी सार्वजनिक गरेको छ । राजधानीमा एक कार्यक्रम गरी सोमबार कम्पनीले आकर्षक पोलिसी सार्वजनिक गरेको हो ।

‘शिखर अटो प्लस इन्स्योरेन्स’ पोलिसी अन्तर्गत बिमा गर्नेहरूको दाबी भुक्तानी गर्दा ह्रास कट्टी नहुने, पूर्ण क्षति भएमा नयाँ मोटरले प्रतिस्थापन गर्न मिल्ने र दुर्घटनापछि मोटर मर्मत गर्न लाग्ने समयावधिमा बिमितलाई यातायात खर्च दिने सुविधा रहेको प्रमुख कार्यकारी अधिकृत दीप प्रकाश पाण्डेले जानकारी दिए । ‘एउटा कारको बम्पर फेर्नुपर्दा २५–३० हजार रुपैयाँ लाग्छ । ह्रास कट्टीपछि बिमितले १२–१५ हजार रुपैयाँ मात्र पाउने गरेका थिए । शिखर अटो प्लस इन्स्योरेन्स गरेको अवस्थामा ह्रास कट्टी हुँदैन, पुरै रकम भुक्तानी पाउनेछन्,’ उनले भने ।

नयाँ पोलिसीमा पुरानो गाडी पूरै क्षति हुँदा नयाँ गाडी लिन सकिने सुविधा पनि छ । त्यस्तै मोटर ग्यारेजमा राखेपछि बिमितलाई यातायातको असुविधा हुन नदिन मोटरसाइकल धनीलाई दैनिक ५ सयदेखि २ हजार रुपैयाँसम्म र चार पांग्रे मोटरको लागि दैनिक १५ सयदेखि ४५ सय रुपैयाँसम्म यातायात खर्च दिइने कम्पनीले जनाएको छ । यस्तो रकम बिमांकको आधारमा तय हुने पाण्डेले बताए । कम्पनीले याताया सुविधा मोटर आंशिक क्षति भएको अवस्थामा १४ दिन र पूर्ण क्षति भएको अवस्थामा ३० दिनसम्म दिनेछ ।

निर्जीवन बिमा बजारको ५० प्रतिशत हिस्सा मोटर बिमाले ओगटेको छ । नयाँ पोलिसीले मोटर बिमा क्षेत्रमा बिमाबापतको क्षतिपूर्ति कम पाउने गरेको ग्राहकको गुनासो सम्बोधन गर्न मद्दत पुग्ने प्रमुख कार्यकारी अधिकृत पाण्डेको विश्वास छ ।

कार्यक्रममा बिमा समितिका अध्यक्ष चिरञ्जीवी चापागाईंले नयाँ बिमा पोलिसी सिर्जनात्मक भएको बताए । त्यस्तै वरिष्ठ हास्य कलाकार एवं शिखर इन्स्योरेन्सका ब्रान्ड एम्बेस्डर हरिवंश आचार्यले शिखरको अटो प्लस योजना उपयोगी भएको जनाए ।

प्रकाशित समय १२:१८ बजे