नेपाल बैँकको नेतृत्वमा नौवटा बैँकले लाप्चे खोला जलविद्युत आयोजनामा लगानी गर्ने भएका छन् । १६० मेगावाट क्षमताको लाप्चे खोलामा नेपाल बैँकसहित, नेपाल इन्भेस्टमेन्ट बैँक, राष्ट्रिय वाणिज्य बैँक, हिमालयन बैँक, लक्ष्मी बैँक, नेपाल एसबीआई बैँक, बैँक अफ काठमाडौँ, कृषि विकास बैँक र कर्मचारी सञ्चय कोषले १९ अर्ब ६५ करोडभन्दा बढी लगानी गर्ने भएका हुन् ।

आयोजनामा नेपाल बैँकले ५ अर्ब, इन्भेस्टमेन्ट बैँकले ३ अर्ब ५० करोड, कर्मचारी सञ्चय कोषले २ अर्ब, राष्ट्रिय वाणिज्य बैँकले २ अर्ब, हिमालयन बैँकले २ अर्ब, लक्ष्मी बैँकले १ अर्ब ८८ करोड २५ लाख, एसबीआई बैँकले १ अर्ब, बैँक अफ काठमाडौँले १ अर्ब र कृषि विकास बैँकले १ अर्ब लगानी गर्ने भएका हुन् ।

निजी क्षेत्रको लगानीबाट बन्न लागेको यो देशकै ठूलो आयोजना हो । लाप्चे खोलामा एमभी दुगड ग्रुपको मुख्य लगानी छ । नासा हाइड्रोपावरले प्रवर्धन गर्न लागेको उक्त जलविद्युत आयोजना दोलखाको बिगु गाउँपालिकास्थित लाप्चे खोलामा पर्छ ।

सम्झौता कार्यक्रममा नाशाका अध्यक्ष मोतिलाल दुगडले सरकारी बैँकहरुमा ढिलासुस्ती हुन्छ भन्ने धारणा गलत रहेको र २०७९ साउनसम्ममा आयोजनाबाट व्यापारिक उत्पादन सुरु गरिने जानकारी गराए ।

प्रकाशित समय १३:५७ बजे