नेकपा (क्रान्तिकारी माओवादी) का महासचिव मोहन वैद्यले शनिबार शिक्षण अस्पताल पुगी अनसनरत डा. गोविन्द केसीलाई भेटी उनको स्वास्थ्यबारे जानकारी लिएका छन् ।

महासचिव वैद्यले डा. केसीलाई भेटी उनको अभियानमा आफ्नो पार्टीको पूर्ण समर्थन र साथ रहेको बताएका डा. केसीका सहयोगी विशद दाहालले जानकारी दिए । शनिबार साँझ अस्पताल पुगेका वैद्यले डा. केसीलाई आफ्नो स्वास्थ्यको ख्याल राख्नपनि आग्रह गरेका दाहालले जानकारी दिए ।

चिकित्सा शिक्षा क्षेत्रको माग राखेर डा. केसी १५ औं पटकको २२ दिनको आमरण अनसनमा छन् । असार १६ मा जुम्लामा अनसन शुरु गरेका डा. केसीलाई सरकारले गत बिहीबार काठमाडौं ल्याएपनि उनले कुनै पनि स्वास्थ्य परीक्षण गराउन र औषधि लिन अस्वीकार गर्दै आएका छन् ।

साधारण स्लाइन मात्र लिने बताएपछि उनको स्वास्थ्य अवस्था गम्भीर बन्दै गएको र कुनैपनि समयमा अप्ठेरोमा पर्न सक्ने बताइएको छ ।

(रासस)

प्रकाशित समय २०:५५ बजे