अनशनरत डाक्टर गोविन्द केसीको सर्मथनमा आमनागरिक आजदेखि सामुहिक सत्याग्रहमा बस्ने भएका छन् । सोलिडारिटी फर डाक्टर केसी एलाइन्सले गर्न लागेको सामुहिक सत्याग्रहमा दुई सय भन्दा धेरैले सहभागिता जनाउने डा. केसीका सहयोगि अभिषेकराज सिंहले जानकारी दिए । उनका अनुसार सत्याग्रह बिहान १० देखी साँझ ५ बजेसम्म हुने छ । डा. केसीको माग सम्बोधन गर्न सरकारलाई दबाब दिन सामुहिक सत्याग्रहमा बस्न लागिएको जनाइएको छ ।
डा. केसी १५ औं पटक अनशन बसेको २३ औं दिन पुग्दा उनको स्वास्थ्य अवस्था यकिन हुन सकेको छैन । जुम्लाबाट सरकारले बल प्रयोग गरेर जबर्जस्त ल्याएको भन्दै डा. केसीले स्वास्थ्य उपचार गराउन मानेका छैनन् । डा. केसीले स्वास्थ्य परीक्षण नगराउने अडान लिएकाले स्वास्थ्य अवस्था यकिन हुन नसकेको हो ।
केसीको स्वास्थ्य अवस्था जटिल हुँदा पनि वार्ता प्रक्रिया अगाडी बढेको छैन । यद्यपी, हिजो एक मन्त्रीले डा. केसीका प्रतिनिधिसँग अनौपचारिक छलफल गरेका छन् । प्रधानमन्त्री केपी ओलीले छलफलका लागि मन्त्री खटाएका थिए । छलफलमा खटाइएको मन्त्रीको नाम भने सार्वजनिक गरिएको छैन । ती मन्त्रीले डा. केसीका मागका विषयमा प्रधानमन्त्रीलाई जानकारी गराउने बताएको डा. केसीका वार्ता टोलीका सदस्य जीवन क्षेत्रीले जानकारी दिए ।
यसैबीच सरकारी वार्ता टोलीले डा. केसीलाई निसर्त वार्तामा आउन आह्वान गरेको छ । वार्ता टोलीका संयोजक तथा शिक्षा, विज्ञान तथा प्रविधि मन्त्रालयका सचिव खगराज बरालले विज्ञप्ती जारी गरी वार्तामा आउन आह्वान गर्नुभएको हो । उता डा. केसीका वार्ता टोलीले भने संसदमा पेश भएको चिकित्सा शिक्षा विधेयक फिर्ता वा स्थगित नभएसम्म वार्तामा नबस्ने अडान लिएको छ । डा. केसीको  समर्थनमा हिजाे राजधानीमा बृहत प्रदर्शन समेत गरिएको थियो ।

प्रकाशित समय ०८:०० बजे