विश्व हिन्दु महासंघ अन्तर्राष्ट्रिय कमिटीका केन्द्रीय अध्यक्ष भरतकेशर सिंहको निधन भएको छ । ललितपुरको बयोधा अस्पतालमा उपचारको क्रममा सिंहको बिहान ३ बजे निधन भएको महासंघका सचिव देवीप्रसाद आचार्यले बताए । ८५ वर्षिय सिंहको पिसाब नलीमा संक्रमण देखिएको थियो । ३ सातादेखि अस्पताल भर्ना भएका सिंहलाई पछिल्लो समय निमोनिया समेत भएको थियो ।

सिंहको निधनको खबर पाएपछि बिहानै उनका शुभचिन्तकहरु बयोधा अस्पताल परिसर पुपुेका छन् । दिउसो साढे १२ बजे श्रद्धाञ्जलीको उनको पार्थिव शरीर पशुपतिनाथस्थित बनकालीमा राख्ने र आजै अन्तिम संस्कार गर्ने महासंघले तयारी गरेको छ । आचार्यका अनुसार बनकाली स्थीत हंश मण्डपमा अन्तिम श्रद्धाञ्जलीका लागि राखिने छ । भारतबाट समेत सिंहलाई श्रद्धाञ्जली दिन हिन्दुवादी नेता तथा धर्मगुरुहरु नेपाल आउने बताइएको छ । उनलाई नेपाली सेनाले अन्तिम सलामी दिनेछ । सिंहले नेपाली सेनामा महासेनानी (जर्नेल) बाट अवकाश पाएका थिए । उनकी श्रीमतीको भने निधन भइसकेको छ ।
मुलुकमा धर्म निरपेक्ष राज्य घोषणा भएपछि सिंहले नेपाललाई हिन्दु अधिराज्य बनाउनुपर्ने भन्दै त्यसको अगुवाई गर्दै आएका थिए । सिंहको निधनले हिन्दु राज्य निर्माण गर्ने अभियानमा ठेस पुगेको विश्व हिन्दु महासंघ अन्तर्राष्ट्रिय कमिटीका सचिव आचार्यले बताए ।

प्रकाशित समय ०९:३० बजे