पासाङल्हामु राजमार्ग अवरुद्ध हुँदा रसुवागढी नाकाबाट ल्याउन लागिएको सामान केरुङमै थन्किएको छ । राजमार्गको विभिन्न ठाउँमा झरेको पहिरो नपन्छाउँदा राजमार्ग अवरुद्ध भएको हो ।

रसुवागढीको नाका नजिकै रहेको घट्टेखोलाको पुलमा समेत क्षति पुगेको छ । नेपाल प्रवेश गर्न लागेको मालबाहक कन्टेनर केरुङमै थन्किएका छन् ।

राजमार्ग अवरुद्ध भएको तीन साता पुग्दा समेत खुलाउन पहल नभएको भन्दै व्यवसायी आक्रोशित भएका छन् । चाडपर्वका लागि ल्याउन लागिएको सामान उतै थन्किएपछि व्यवसायी आक्रोशित भएका हुन् । लोड गरिएको अधिकांश सामान दशै र तिहारका रहेका छन् ।

यसैबीच नेपाल राष्ट्रिय व्यवसायी महासघंले राजमार्ग छिटो खुलाउन सरकारलाई आग्रह गरेको छ । सडक अवरुद्ध हुँदा मालबाहक ट्रक तथा कन्टेनर रोकिएर व्यवसायी मर्कामा परेको भन्दै महासंघले छिटो राजमार्ग खुलाउन आग्रह गरेको हो ।

महासंघका अध्यक्ष नरेश कटुवालले विज्ञप्ति निकालेर चाडपर्वका सामान रहेकाले छिटो राजमार्ग खुलाउन आग्रह गरेका छन् ।

प्रकाशित समय ०८:३६ बजे