पार्टी गठन भएपछि पहिलो पटक नेपाल कम्युनिष्ट पार्टी (नेकपा)को स्थायी कमिटी बैठक आज बस्दैछ । संगठनात्मक संरचनासम्बन्धी सुझाव दिन गठित समितिको प्रतिवेदन अनुसार विभिन्न आयोग तथा जनवर्गीय विभाग गठन गर्न बैठक बस्न लागेको नेताहरुले बताएका छन् । अपराह्न ३ बजेपछि प्रधानमन्त्री निवास बालुवाटारमा बस्ने भनिएको बैठकमा संगठनात्मक संरचना सम्बन्धी सुझाव दिन गठित कार्यदलले प्रतिवेदन पेस गर्ने छ । जेठ ७ गते पार्टी सचिवालय बैठकले पार्टीको अन्तरिम विधानको अधिनमा रहेर महासचिव विष्णु पौडेलको संयोजकत्वमा उक्त कार्यदल गठन गरेको थियो । कार्यदल सदस्यमा नेता देवप्रसाद गुरुङ, बेदुराम भुसाल र खिमलाल देवकोटा छन् ।

कार्यदलले पार्टीमा चार शक्तिशाली आयोग व्यवस्था गर्न सुझाव दिएको सदस्य वेदुराम भुसालले जानकारी दिए । कार्यदलको प्रतिवेदनमा केन्द्रीय अनुशासन आयोग, केन्द्रीय निर्वाचन आयोग र केन्द्रीय लेखा परीक्षण आयोग, सल्लाहकार आयोग गठन गर्न सुझाव समेटिएको छ । ‘केन्द्रमा चार शक्तिशाली आयोग गठन गरिने व्यवस्था प्रस्ताव छ, पछि महाधिवेशनबाट निर्वाचित आयोगलाई स्वतन्त्र रूपमा कार्यसम्पादन गर्ने अधिकार हुनेछ ।’ कार्यदल सदस्य भुसालले न्युजकारोबारसँग भने ।
अध्यक्ष, सचिव र २९ सदस्यसहित आयोग ३१ सदस्यीय हुनेछन । आयोग अध्यक्षको हैसियत पार्टीमा स्थायी कमिटी, सचिवको पोलिटब्युरो र सदस्यको केन्द्रीय सदस्यसरह हुनेछ ।
चार आयोगका साथै पार्टीमा २८ देखि ३२ वटासम्म विभागको गठनबारे समेत आजको बैठकमा छलफल हुने नेता कृष्णगोपाल श्रेष्ठले जानकारी दिए । ‘विभाग केन्द्र, प्रदेश र जिल्लामा समेत गठन हुनेछन्,’ श्रेष्ठले भने । केन्द्रमा रहने प्रत्येक विभागमा ३५ जना, प्रदेश स्तरमा १५ जना र जिल्लामा ११ जना सदस्य रहनेछन् । प्रत्येक विभागमा प्रमुख, उपप्रमुख र सचिवसहितको पदाधिकारी रहनेछन् ।

प्रतिवेदनमा केन्द्रीय सचिवालय, स्थायी कमिटी, पोलिटब्युरो, केन्द्रीय कमिटीका साथै पार्टीका विभाग तथा जनवर्गीय संगठनको काम, कर्तव्य एवं अधिकारका विषयमा समेत बाँडफाँट गरिएको छ ।

भ्रातृ संगठनबीच समन्वय कायम गर्न मोर्चा संगठन र सम्पर्क मञ्चको समन्वय गर्न सम्पर्क समन्वय कमिटी पनि गठन गर्ने पनि नेकपाको तयारी छ । प्रवास कमिटीले प्रवासमा रहेका प्रवासी मञ्चहरुको संयोजन र त्यहाँ कार्यरत सदस्यहरुको वरीयता निर्धारण गर्ने व्यवस्था गरिएको छ ।

भ्रातृ संगठन एकीकरणको तयारीमा
तत्कालिन माओवादी केन्द्र र एमालेका भातृ संगठनबीचको एकता प्रक्रिया पनि अन्तिम चरणमा पुगेको बताइएको छ । भ्रातृ संगठन, पेसागत संगठनहरुको एकताका लागि पनि छुट्टै सुझाव संकलनका लागि गठित कमिटीले सुझाव संकलन गरिरहेको छ । युवा संघ नेपाल, वाईसीएल नेपाल, प्रेस चौतारी नेपाल, प्रेस सेन्टर नेपाललगायतका भ्रातृ संगठनहरुको बैठक बसेर एकताको गृहकार्य सुरु गरिसकेका छन् । शुक्रबार प्रेस चौतारी र प्रेस सेन्टरको संयुक्त बैठकलाई अध्यक्ष पुष्पकमल दाहाल (प्रचण्ड)ले सम्बोधन गरे । नेकपा का २२ मध्ये १४ भ्रातृ संगठनको नेतृत्व तत्कालिन एमाले र ८ वटाको नेतृत्व तत्कालिन माओवादी केन्द्रका नेताले लिने सहमति छ ।

प्रकाशित समय ११:३५ बजे