सन नेपाल लाइफ इन्स्योरेन्स कम्पनीले जीवन बिमा कोषमा एक अर्ब २५ करोड ३२ लाख रुपैयाँ जम्मा गरेको छ । एक वर्षमै सन नेपाल लाइफ इन्स्योरेन्स कम्पनी जीवन बिमा कोषमा दोब्बरभन्दा बढी रकम जम्मा गर्न सफल भएको हो । अघिल्लो आर्थिक वर्षमा कम्पनीले ६० करोड ३९ लाख रुपैयाँ जम्मा गरेको थियो ।

त्यस्तै कम्पनीको जीवन बिमा शुल्क आर्जनमा समेत उल्लेख्य वृद्धि भएको छ । अघिल्लो वर्ष खुद बिमा शुल्क ७८ करोड ९९ लाख रुपैयाँ संकलन गरेको कम्पनीले गत वर्ष एक अर्ब ७ करोड ३९ लाख ३७ हजार रुपैयाँ संकलन गरेको हो । सन नेपाल लाइफको कुल बिमा शुल्क आर्जन दुई अर्ब २२ करोड ९६ लाख ७१ हजार रहेको छ । अघिल्लो वर्ष कम्पनीको कुल बिमा शुल्क आर्जन एक अर्ब १२ करोड ४५ लाख तीन हजार रुपैयाँ थियो ।

कम्पनीले समीक्षा अवधीमा ११ करोड ४२ लाख रुपैयाँ नाफा गरेको छ । अघिल्लो वर्ष कम्पनीको नाफा १० करोड २१ लाख रुपैयाँ थियो । कम्पनीको व्यवस्थापन खर्च भने केही बढेको छ । अघिल्लो वर्ष २३ करोड ८५ लाख खर्च गरेको कम्पनीले गत वर्ष ३० करोड ८९ लाख रुपैयाँ व्यवस्थापन खर्च गरेको छ । बिमा कम्पनीले हालसम्म ४३ हजार २५६ वटा बिमा पोलिसी जारी गरेको छ । अघिल्लो वर्षको तुलनामा यो करिब पाँच हजार आठ सयले बढी हो ।

अघिल्लो वर्ष ३४ लाख ६ हजार रुपैयाँ दाबी भुक्तानी गरेकत्र कम्पनीले गत वर्षभरमा ७२ लाख ३१ हजार रुपैयाँ दाबी भुक्तानी गरेको छ । कम्पनीको बाँकी दाबी भुक्तानी दुई लाख ९९ हजार रुपैयाँ छ । अघिल्लो वर्ष २२ लाखभन्दा बढी भुक्तानी बाँकी थियो ।

प्रकाशित समय १६:०९ बजे