गृहपृष्ठ अझै आधामात्रै क्षमतामा चल्छन् उद्योग
अझै आधामात्रै क्षमतामा चल्छन् उद्योग
देशमा विद्युत्को निरन्तर उपलब्धता बढेपछि उद्योगहरूले आफ्नो क्षमता उपयोग केही बढाए पनि अझै जडित क्षमता पूर्ण रूपमा सञ्चालन हुन नसकेको पाइएको छ । नेपाल राष्ट्र बैंकले गरेको गत आर्थिक वर्ष २०७५/७६ को अर्द्ध–वार्षिक अवधि आर्थिक गतिविधि अध्ययनअनुसार देशभरिका उद्योगहरूको औसत क्षमता उपयोग ६० प्रतिशतमात्र छ । गत वर्षको यसै अवधिमा ती उद्योगको औसत क्षमता उपयोग ५८ प्रतिशत रहेको थियो ।
यसले देशमा औद्योगिक वातावरण अझै कमजोर नै छ भन्ने संकेत मिल्छ । आयातको धनराशि बढेर १३ खर्ब रुपैयाँ नाघेका बेला स्वदेशी उद्योगहरू कम क्षमतामा चल्दा त्यसको असर भुक्तानी सन्तुलनमा पनि पर्छ ।
प्रमुख निर्यातजन्य वस्तुहरूमध्ये पश्मिना, वनस्पति घिउ र प्रशोधित चियाको उत्पादन बढे पनि गार्मेन्ट उद्योगको क्षमता उपयोग सबैभन्दा कम अर्थात् ३२.१ प्रतिशत मात्र रहेको देखिएको छ । यसको असरले देशको निर्यातबाट आयमा असर पार्छ । यो वर्षको ११ महिनामा देशबाट ८७ अर्ब ८३ करोड रुपैयाँको मात्रै निर्यात भएको छ ।
यो अवधिमा आफ्नो जडित क्षमता धेरै उपयोग गर्ने उद्योगहरूमा पश्मिना, बियर, वनस्पति घिउ, फलामको रड, प्रशोधित चिया, खानेतेल र चाउचाउ उद्योग परेका छन् । पश्मिना उद्योग आफ्नो क्षमताको करिब ९८ प्रतिशत चलेको देखिए पनि यो गत वर्षभन्दा घटेको हो । गत वर्षको यही अवधिमा पश्मिन उद्योग लगभग सतप्रतिशत क्षमतामा चलेका थिए ।
बियर उद्योगहरूले आफ्नो क्षमताको ८९ प्रतिशत उत्पादन गरेका छन् । बियर उद्योगहरूको जडित क्षमता ५ करोड ७२ लाख लिटर भएकोमा तिनले ५ करोड ९ लाख लिटर उत्पादन गरेको राष्ट्र बैंकको अध्ययनमा उल्लेख गरिएको छ ।
यो अवधिमा खानेतेल उद्योगहरूले ६४ दशमवलव ७७ प्रतिशत, प्रशोधित चिया उद्योगले ६४ दशमवलव ९४ प्रतिशत, चाउचाउ उद्योगले ६४ प्रतिशत, हल्का पेयपदार्थ उद्योगले ६१ दशमवलव ७७ प्रतिशत क्षमता उपभोग गरेका छन् ।
देशभरिका चाउचाउ उद्योगका जडित क्षमता ५ करोड ६० हजार मेट्रिक टन रहेकामा तिनले ३ करोड २० लाख ५३ हजार मेट्रिक टन उत्पादन गरेका छन् । गत वर्षका तुलनामा यस वर्ष चाउचाउ उद्योगका क्षमता उपभोग भने घटेको छ ।
निर्माणजन्य उद्योगहरू सिमेन्ट र फलामे डन्डीको क्षमता उपयोग घटेको देखिन्छ । यसले निर्माण क्षेत्रमा आएको सुस्सतालाई प्रतिबिम्बत गरेको छ ।
राष्ट्र बैंकको अध्ययनले समेटेका उद्योगमध्ये वनस्पति घिउ तथा तेल, अन्न तथा पशुदाना, प्रशोधित दूध, अन्य खाद्य पदार्थ, चुरोट, सिन्थेटिक कपडा, पश्मिना, गार्मेन्ट, रोजिन, विजुलीका तार र केबुलको उत्पादनमा कमी आएको छ । मदिरा, वियर, हल्का पेय पदार्थ, धागो, जुटका सामान, प्रशोधित छाला, चिरेको काठ, कागज तथा कागजका उत्पादन, प्लाष्टिकका सामान, धातुका उपकरण आदिको उत्पादनमा वृद्धि भएको अध्ययनले देखाएको छ ।
राष्ट्र बैंकका अनुसार पेय पदार्थ समूहको उत्पादन ११.४ प्रतिशत, जुटका सामान १३.३ प्रतिशत, चिरेको काठको उत्पादन २६.१ प्रतिशत, कागज तथा कागजका उत्पादन ५०.५ प्रतिशत, प्लास्टिकको सामानको उत्पादन १.५ प्रतिशतले बढेको छ भने वनस्पति घिउ तथा तेल ७.० प्रतिशत, दुग्ध पदार्थ ९.८ प्रतिशत, अन्न तथा पशुदाना समूहको उत्पादन ५.७ प्रतिशत, अन्य खाद्य पदार्थ समूहको उत्पादन ३.४ प्रतिशत र चुरोटको उत्पादन १२.३ प्रतिशतले कमी आएको छ ।
यस्तै, तयारी कपडा ५१.४ प्रतिशत, रोजिनको उत्पादन ९९.२ प्रतिशत तथा विजुलीको तार र केबुल उत्पादनमा १.७ प्रतिशतले कमी आएको छ ।
प्रकाशित समय १३:१२ बजे