लुम्बिनी अञ्चल अस्पतालको सटर भाडामा दिने बोलपत्र आह्वानको विषयलाई लिएर अध्यक्ष रमेश खनाल र मेडिकल सुपरिटेन्डेन्ट डा. कृष्णप्रसाद खनालबीच विवाद बढेको छ । सावर्जनिक खरिद ऐन २०६३ अनुसार २०७५ जेठ २७ गते अध्यक्ष खनालले समितिबाट निर्णय गराई बोलपत्र आह्वान गरेकोमा सोमबार अस्पतालका मेसुले सूचना जारी गर्दै बोलपत्र अनिश्चतकालका स्थगित गरेका हुन् ।

देश प्रादेशिक संरचनामा गएको भन्दै प्रदेश सरकारले नै बोलपत्रको टुंगो लगाउने उपप्रधान एवं स्वस्थ्य तथा जनसंख्यामन्त्रीको निजी सचिवको निर्देशनसहितको पत्रका आधारमा बोलपत्र स्थगित गरिएको मेसु खनालले बताए । अस्पतालका अध्यक्षले भने पत्रकार सम्मेलन गरी विकास समितिका पदाधिकारीलाई जानकारी नदिई मेसुले एकलौटी रुपमा टेन्डर रोकेको आरोप लगाएका छन् । निजी सचिवको पत्रका आधारमा टेन्डर रोकिने प्रावधान नरहेको उनको दाबी छ ।

बैठकमा एजेन्डाका रुपमा म्याद थपको लबिङ भएको र त्यो प्रयास विफल भएपछि गलत प्रक्रिया अपनाएर रोकिएको अध्यक्ष खनालले उनले बताए । जग्गा र फार्मेसीको बिषयमा समेत ‘नोट अफ डिसेन्ट’ लेखेको भन्दै उनले मेसु अधिकार क्षेत्रभन्दा बाहिर गएको बताए ।

सटरका लागि आइतबारसम्म दुई सय ४५ टेन्डर फर्म खरिद भएको र १२ वटा दर्ता भइसकेको अस्पतालले जनाएको छ । हाल अस्पतालका ६९ वटा सटर छन् । सटरबाट मासिक ६ करोड ५९ लाख ६० हजार नौ सय ६७ रुपैयाँ आम्दानी हुने गरेको थियो ।

प्रकाशित समय १७:३९ बजे