जापानी ब्रान्ड इसुजुको आधिकारिक बिक्रेता रेज मोटर्सले पोखरामा नयाँ मोडलको सिंगल क्याब डी म्याक्स गाडी लञ्च गरेको छ । रेज मोर्टर्सको पोखरा नयाँबजारस्थित सोरुममा बुधबार इसुजु सिंगल क्याब गाडी लञ्च गरेको रेज मोटर्स कम्पनीका प्रबन्ध निर्देशक अशोक चालिसेले जानकारी दिए ।
जापानको प्रसिद्ध कम्पनी इसुजुले जापानमै इन्जिन उत्पादन गरेर अरु सामान थाइल्यान्डमा उत्पादन तथा भारतमा एसेम्बल गरी दक्षिण एसिया क्षेत्रको बजारमा पठाउने गरेको बताइएको छ । गाडीमा ३ टनसम्म सामान ओसारपसार गर्न सकिन्छ । इन्जिन क्षमता २५ सय सिसी भएकाले नेपालको पहाडी र कच्ची बाटोको लागि समेत निकै उपयोगी हुने विक्रेता कम्पनीको दावी छ । यसको बजार मूल्य २४ लाख ९० हजार कायम गरिएको छ ।
कम्पनीका अनुसार सिंगल क्याब डी म्याक्स डेकको लम्बाइ ८ फिट र चौडाइ साढे ५ फिट छ । रेज मोटर्स कम्पनीका प्रबन्ध निर्देशक अशोक चालिसेले भने,‘कच्ची बाटोमा समेत सामानसहित गुड्न सक्ने भएकाले व्यावसायिक प्रयोजनका लागि यो गाडी निकै उपयुक्त छ ।’
रेज मोर्टसले पोखराबाटै इसुजुकै डबल क्याबिनयुक्त सुविधा सम्पन्न गाडी समेत बिक्री गर्दै आएको छ । सामानसहित परिवारै अट्नसक्ने यो गाडीको नेपाली बजारमा मूल्य ४१ लाख रुपैयाँ छ । फोर ह्विलसमेत भएको इसुजुकै डबल क्याब जीपको भने बजार मूल्य ६५ लाख रुपैयाँ छ । पोखरामा सो रुम खुलेको १५ महिनाको अवधिमा इसुजु ब्रान्डका विभिन्न मोडलका ७५ भन्दा बढी गाडी बिक्री भएको रेज मोटर्सका प्रवन्ध निर्देशक अशोक चालिसेले बताए ।

प्रकाशित समय २०:१४ बजे