काठमाडौं– गत साता नेपाल स्टक एक्सचेन्जमा एक अर्ब आठ करोड १९ लाख रुपैयाँबराबरको सेयर किनबेच भएको छ । एक सय ७६ कम्पनीको २३ लाख २९ हजार चार सय ४० कित्ता सेयर खरिद–बिक्री हुँदा एक अर्बबढीको कारोबार भएको हो । यो कारोबार रकम गत साताको भन्दा ४५.९६ प्रतिशत कम हो । गत साता १ सय ८१ कम्पनीको दुई अर्ब १९ लाख ९९ हजार रुपैयाँबराबरको सेयर किनबेच भएको थियो । साताको नेप्से परिसूचक पहिलो दिनको तुलनामा १.४८ अंकले बढेर बिहीबार १३३९.६५ अंकमा पुगेको छ । त्यस्तै, ‘क’ वर्गका कम्पनीहरुको कारोबार मापन गर्ने सेन्सेटिभ परिसूचक पहिलो दिनको तुलनामा ०.१२ अंकले बढेर २८२.३० अंकमा आइपुगेको छ । गत साता कारोबार रकम (सात करोड एक लाख ८० हजार रुपैयाँ) को आधारमा सिद्धार्थ बैंक अग्रस्थानमा छ । कारोबार भएको सेयर संख्या (दुई लाख ११ हजार कित्ता) को आधारमा पनि सिद्धार्थ बैंक अग्रस्थानमा छ । त्यसैगरी, कारोबार संख्या (६५२ वटा) को आधारमा नेपाल इन्भेस्टमेन्ट बैंक अगाडि छ । गत साता नेपाल स्टक एक्सचेन्जको कारोबार कक्ष नियमित कारोबारका लागि चार दिन खुला रह्यो । ऋणपत्रतर्फ संस्थागत तथा सरकारी ऋणपत्रहरुको कुनै पनि कारोबार भएन ।

प्रकाशित समय १५:३६ बजे