एनआईसी एशिया बैंकले जेठमा पनि ऋणीलाई १० प्रतिशत ब्याज छुट दिने भएको छ । नेपाल राष्ट्र बैंकको निर्देशनअनुसार २०७६ चैत मसान्तसम्म कायम ब्याजदरमा २ प्रतिशत ब्याज सहुलियत र १० प्रतिशत ब्याज छुट तथा शतप्रतिशत जरिवाना छुट गरेको थियो । बैंकले वैशाखमा पनि १० प्रतिशत र शतप्रतिशत जरिवाना छुट दिएको थियो ।

कोभिड १९ महामारीबाट सम्पूर्ण ऋणीहरुलाई परेको असरको मूल्यांकन गर्दै जेठका लागि समेत १० प्रतिशत छुटको योजना लागू गरिएको बैंकले विज्ञप्तिमार्फत जनाएको छ । जसअनुसार बैंकले राष्ट्र बैंकले व्यवस्था गरेको कर्जामा २ प्रतिशत ब्याज छुटका अलावा जेठसम्ममा तिर्नुपर्ने सम्पूर्ण बक्यौता रकम सोही मसान्तभित्र पूर्णरुपमा चुक्ता गरेमा सम्पूर्ण ब्याज रकममा १० प्रतिशत छुट तथा जरिवाना ब्याजको शतप्रतिशत रकम छुटको योजना ल्याएको हो ।

प्रकाशित समय १३:०१ बजे