नेशनल पेमेन्ट्स इन्टरफेस (NPI)को प्रयोग गरी रेमिटेन्स कारोबारहरु सिधै लाभग्राहीको बैंक खातामा जम्मा हुने गरी सुविधा दिन ईजीलिंक रेमिटेन्स प्रालि अप्रत्यक्ष सदस्यको रुपमा नेपाल क्लियरिङ हाउसमा आवद्ध भएको छ ।

यो व्यवस्थासँगै ईजीलिंक रेमिटेन्सका भुक्तानीका कारोबारहरु connectIPS e-Payment प्रणालीमार्फत रियल टाइममा तुरुन्तै भुक्तानी गर्न सकिन्छ भने अन्तरबैंक विद्युतीय भुक्तानी प्रणाली NCHL-IPS मार्फत तोकिएको समय सीमामा समेत भुक्तानी कारोबारहरु गर्न सकिनेछ । यस साझेदारीले बैंक खातामा आधारित रेमिटेन्सको लागि सेवा प्रवाहमा उल्लेख्य सुधार ल्याउने ईजीलिंकको अपेक्षा छ ।

विभिन्न भुक्तानी प्रणालीहरुको एकीकृत इन्टरफेसको रुपमा विकास गरिएको NPI मार्फत हाल उपलब्ध connectIPS / NCHL-IPS को सञ्जालमा क्रमश ५२ र ६३ सदस्य बैंक तथा वित्तिय संस्थाहरु आवद्ध छन् । एनसीएचएलले NCHL-ECC, NCHL-IPS, connectIPS e-Payment, connectRTGS / NPI प्रणालीहरु सञ्चालन गर्दै आएको छ । साथै यसले आफ्ना भुक्तानी प्रणालीहरुमा विभिन्न इन्स्योरेन्स, रेमिट्यान्स, पीएसपी/पीएसओ , सरकारी तथा अर्ध-सरकारी संस्थाहरुलाई इन्डाइरेक्ट-प्राविधिक सदस्यका रुपमा आवद्ध गराई सेवा प्रदान गर्दै आएको छ । यसमा हाल आईएमई लिमिटेड, सिटी एक्सप्रेस मनि ट्रान्सफर, जीएमई रेमिट, भाटभटेनी रेमिट, क्याशवे मनि ट्रान्सफर, आईपे रेमिट र ललित मनि ट्रान्सफर गरी ७ भन्दा बढी रेमिटेन्स कम्पनी समावेश छन् । अन्य ३४ गैरबैंकिङ संस्थाहरु इन्डाइरेक्ट/प्राविधिक सदस्यका रुपमा आवद्ध छन् । जसमा पीएसपी/पीएसओ, इन्स्योरेन्स कम्पनीहरु, रेमिटेन्स, मर्केन्ट बैंक, सरकारी तथा अर्ध-सरकारी संस्थाहरु रहेका छन् ।

ईजीलिंक रेमिटेन्स प्रालि सन् १९९९ मा स्थापना भएको रेमिटेन्स कम्पनी हो । यसले सुरक्षित, छिटो र भरपर्दो माध्यमबाट विदेशबाट नेपालमा रेमिटेन्स पठाउन योगदान पुर्‍याउँदै आइरहेको छ । यसले उचित शुल्कमा गुणस्तरीय रेमिटेन्स सेवा पुर्‍याउने उद्देश्यका साथ नेपालभित्र र बाहिर विभिन्न साझेदारी गर्दै आएको छ ।

प्रकाशित समय १२:५१ बजे