जर्मन सरकारको सहयोगमा सेडरा आईआई (सस्टेनेबल इकोनोमिक डेभलपमेन्ट इन रुरल एन्ड अर्ब्यान एरियाज) परियोजनाका लागि सिद्धार्थ बैंक, नेपाल राष्ट्र बैंक र केएफडब्लू डेभलपमेन्ट बैंकबीच सम्झौता भएको छ । सम्झौतापत्रमा सिद्धार्थ बैंकका प्रमुख कार्यकारी अधिकृत शम्भुनाथ गौतम र नेपाल राष्ट्र बैंकका लघुवित्त संस्था सुपरिवेक्षण विभाग प्रमुख डा. प्रकाशकुमार श्रेष्ठले हस्ताक्षर गरेका छन् ।

नेपाल सरकार, अर्थ मन्त्रालय र जर्मन सरकारको समन्वय एवं जर्मन वित्तीय विकास निगमको सहयोगमा परियोजना सञ्चालन हुनेछ । नेपालको तर्फबाट राष्ट्र बैंकमार्फत वाणिज्य बैंकमध्येबाट सिद्धार्थ बैंक र जर्मन सरकारको तर्फबाट केएफडब्लू डेभलपमेन्ट बैंकले कार्यान्वयन गर्ने परियोजनामार्फत ग्रामीण तथा अर्धसहरी क्षेत्रको दिगो आर्थिक विकासका लागि लघु तथा साना व्यवसायीलाई प्रत्यक्ष कर्जा सुविधा र तालिम, परामर्शलगायत आवश्यक प्राविधिक सेवा प्रदान गरिनेछ ।

परियोजनाअन्तर्गत लघु, साना तथा मझौला उद्यमीले दुई देखि ४० लाख रुपैयाँसम्मको कर्जा सुविधा पाउनेछन् । कर्जा अवधि १० वर्षसम्मको हुनेछ । परियोजनाले वित्तीय सहयोगका साथै लघु, साना तथा मझौला उद्यमीलाई सीपमूलक तालिम, परामर्श एवं अन्य प्राविधिक सहयोग पनि गर्नेछ ।

प्रकाशित समय १२:३६ बजे