ग्लोबल आइएमई बैंकले चालू आर्थिक वर्षको पहिलो त्रैमासमा गत वर्षको सोही अवधिको तुलनामा ४०.५९ प्रतिशतले खुद नाफा बढाएको छ । हालै प्रकाशित गरेको अपरिष्कृत वित्तीय विवरणअनुसार समीक्षा अवधि बैंकले १ अर्ब ५ करोड ८८ लाख रूपैयाँ नाफा गरेको हो । गत वर्षको सोही अवधिमा बैंकको नाफा ७५ करोड ३१ लाख रुपैयाँ थियो ।

समीक्षा अवधिमा बैंकको खुद ब्याज आम्दानी १ अर्ब २ करोड ८८ लाख रुपैयाँ बढेर २ अर्ब ५९ करोड ३६ लाख रुपैयाँ पुगेको छ । त्यसैगरी, बैंकको सञ्चालन नाफा समीक्षा अवधिमा ४३ करोड २९ लाख रुपैयाँ बढेर १ अर्ब ४७ करोड ५२ लाख रुपैयाँ पुगेको छ ।

खुद नाफा बढे पनि बैंकको प्रतिसेयर आम्दानी भने घटेको छ । गत वर्षको असोजसम्ममा २८ रुपैयाँ ८७ पैसा रहेको बैंकको प्रतिसेयर आम्दानी समीक्षा अवधिमा ६ रुपैयाँ ५५ पैसा घटेर २२ रुपैयाँ ३२ पैसामा झरेको छ । १८ अर्ब ९७ करोड ५८ लाख रुपैयाँ चुक्ता पुँजी कम्पनीको जगेडा कोषमा ९ अर्ब २६ करोड ७१ लाख छ ।

असोजसम्ममा बैंकको निक्षेप संकलन २ खर्ब २४ अर्ब २३ करोड रुपैयाँ पुगेको छ भने कर्जा प्रवाह १ खर्ब ९५ अर्ब ७३ रुपैयाँ पुगेको छ । गत वर्षको असोजसम्ममा ०.८५ प्रतिशत रहेको बैंकको निष्क्रिय कर्जा अनुपात समीक्षा अवधिमा बढेर १.८३ प्रतिशत पुगेको छ । त्यसैगरी, बैंकको आधार दर ९.४४ प्रतिशतबाट घटेर ७.२५ प्रतिशत र स्प्रेड दर ४.९९ प्रतिशतबाट बढेर ५.०३ प्रतिशत पुगेको छ ।

प्रकाशित समय २१:०६ बजे