दसैंका लागि आजदेखि नयाँ नोट साट्न सकिने भएको छ । नेपाल राष्ट्र बैंकले दसैंका लागि नयाँ नोट साट्ने व्यवस्था मिलाएको हो । सरकारी स्वामित्वमा रहेका नेपाल बैंक, राष्ट्रिय वाणिज्य बैंक र कृषि विकास बैंकका शाखा कार्यालयबाट नयाँ नोट साट्न सकिने राष्ट्र बैंकले जनाएको छ ।

सर्वसाधरणले ५, १०, २०, ५० दरका दुई–दुई पाकेट र १०० दरको एक पाकेट गरी प्रतिव्यक्ति २७ हजार रुपैयाँसम्म साट्न सक्ने छन् ।काठमाडौं उपत्यकाको नेपाल बैंकका न्युरोड, पाटन औद्योगिक क्षेत्र, कीर्तिपुर, महाराजगन्ज, जोरपाटी, लाजिम्पाट र भक्तपुर कार्यालयबाट नयाँ नोट साट्न सकिने छ ।

त्यस्तै, राष्ट्रिय वाणिज्य बैंक सिंहदरबार, टेकु, नयाँ बानेश्वर, सानोठिमी, विशाल बजार, नक्साल, कंलकी र बालाजु शाखाबाट पनि नयाँ नोट सटहि गर्न सकिने छ । त्यस्तै, कृषि विकास बैंकको गौशाला, कोटेश्वर, रामशाहपथ, रत्नपार्क, स्वयम्भु र मंगलबजार शाखाबाट नयाँ नोट साट्ने व्यवस्था मिलाइएको राष्ट्र बैंकले जनाएको छ ।

उपत्यकाबाहिर राष्ट्र बैंकका विराटनगर, जनकपुर, विरगन्ज, पोखरा, सिद्धार्थनगर, नेपालगन्ज, धनगढीमा समेत नयाँ नोट साट्ने सकिने छ । राष्ट्र बैंकले प्रत्येक वर्ष दसैंको बेला नयाँ नोट सटहि गर्ने गरेको छ ।

प्रकाशित समय ०८:१५ बजे