विराटनगर भन्सार कार्यालयले चालु आर्थिक वर्षको १० महिनामा कुल ३१ अर्ब ७५ करोड ७२ लाख ७४ हजार रुपैयाँ राजस्व संकलन गरेको छ । सो अवधिमा कार्यालयले ४२ अर्ब ५३ करोड १९ लाख १८ हजार रुपैयाँ राजस्व संकलन गर्ने लक्ष्य लिएको थियो ।

दस महिनामा लक्ष्यको ७४÷६७ प्रतिशत मात्र प्रगति भएको छ । गत वर्ष सो अवधिमा २५ अर्ब ३० करोड ८३ लाख ५२ हजार राजस्व संकलन गर्ने लक्ष्यमा २५ अर्ब ३४ करोड ५६ लाख ८४ हजार रुपैयाँ राजस्व संकलन भएको थियो ।

गत वर्षको तुलनामा चालु आवको सो अवधिमा ६ अर्ब ४१ करोड १५ लाख ९० हजार रुपपैयाँ बढी राजस्व संकलन भएको हो । राजस्व संकलनको स्थिति हेर्दा गत वर्ष साउन र भदौ महिनाबाहेक प्रत्येक महिनामा लक्ष्यभन्दा बढी राजस्व संकलन भएको देखिन्छ भने चालु आवमा साउनमा १००÷६८ प्रतिशत र असोजमा १३३÷५६ प्रतिशत प्रगति भए पनि अन्य महिना राजस्व संकलनमा गिरावट आएको देखिन्छ ।

लक्ष्यअनुसारको राजस्व संकलन गर्न कार्यालयलाई बाँकी दुई महिनामा कठिन यात्रा गर्नुपर्ने अवस्था देखिन्छ भने लक्ष्यमा पुग्न १० अर्ब ७७ करोड ४६ लाख ४४ हजार राजस्व उठाउनुपर्ने स्थिति छ । राजस्व संकलनको स्थिति हेर्दा अब कार्यालयले दुई महिनामा ६ अर्बभन्दा बढी उठाउन सक्ने अवस्था छैन ।

लक्ष्यअनुसारको प्रगति नभएको जिज्ञासामा कार्यालयका निमित्त प्रमुख मणिराम पौडैलले भने, ‘विभागको महत्वाकांक्षी लक्ष्य र यो नाकाबाट आयात एक्कासि घट्दा तालमेल नमिलको हो ।’ गत वर्षको तुलनामा सो अवधिमा २५ प्रतिशत राजस्व बढी संकलन भएको उनले बताए ।

चालु आवको वैशाखसम्ममा कुल २१ अर्ब २१ करोड १० लाख ७१ हजार मूल्य बराबरको सामान निकासी र १ खर्ब ३६ अर्ब ११ करोड ७१ लाख ७८ हजार मूल्य बराबरको सामान पैठारी भएको छ । गत वर्ष सो अवधिमा निकासी २० अर्ब १० करोड ७ लाख ६० बराबर र १ खर्ब १८ अर्ब १० करोड ५६ लाख ३३ हजार मूल्य बराबरको सामान पैठारी भएको थियो ।

विराटनगर भन्सारदेखि भारत तथा समुद्रपार निकासी वस्तुमा पिना, भेनियर सिट, वनस्पति उत्पादनहरु, चोकर भुस, खजुरको प्रशोधित तेल, सेन्थेटिक यार्न, जुटका बुनिएका कपडा, बोरा र झोला, अन्य रेशाको कपडा, जिआई वायर रहेका छन् । त्यस्तै भारत तथा समुद्रपार पैठारी वस्तुमा हाईस्पिड डिजेल, एमएस बिलेट, तयारी कपडा, पेट्रोल, पोलिथिन दाना, सिआर सिट, स्टिल वायर रड इन क्वायल र एमएससम्म, एलपी ग्यास, एचआर सिट र सिमेन्ट क्लिंकर छन् । रासस

प्रकाशित समय १५:३३ बजे