नेपाल स्टक एक्सचेन्ज नेप्से परिसूचकले २५ सय अंक पार गर्दा आइतबार बजारमा ऐतिहासिक कारोबार भएको छ । लघुवित्त समूह सर्वाधिक बढेको बजारमा नेप्से २५२४ अंकमा उक्लिएको छ भने १० अर्ब ४४ करोड १९ लाखको सेयर कारोबार भएको छ ।

बजार ४८.७४ अंकले बढ्दा बैँक, जलविद्युत र म्युचुअल फन्ड समूह भने घटेका छन् । लघुवित्त समूहमा लगानीकर्ताको उच्च आकर्षण देखिएको छ । लघुवित्त समूह ७.७६ प्रतिशतले बढेको छ ।

आइतबार सातवटा कम्पनीको सेयरमा सकारात्मक सर्किट लागेको छ भने अरु २९ कम्पनीको सकारात्मक सर्किट लेभलमा कारोबार भएको छ । सर्किट लाग्ने कम्पनीहरू सबै लघुवित्त हुन् । डिप्रोक्स लघुवित्त, सारथी नेपाल लघुवित्त, आरएसडीसी लघुवित्त, मेरो माइक्रोफाइनान्स, निर्धन उत्थान लघुवित्त, मञ्जुश्री फाइनान्स र गणपति माइक्रोफाइनान्सको सेयर मूल्यमा सर्किट लागेको हो ।

सर्वाधिक कारोबार हुनेमा हिमालयन डिस्टिलरी, नेपाल लाइफ इन्स्योरेन्स, शिखर इन्स्योरेन्स, ग्लोबल आईएमई बैँकलगायत छन् ।

कारोबारको अन्त्यमा कुल बजार पुँजीकरण ३४ खर्बनजिक पुगेको छ । बजार पुँजीकरण ३३ खर्ब ९९ अर्ब ७२ करोड नाघेको हो ।

प्रकाशित समय १५:४७ बजे