वैदेशिक रोजगारीबाट फर्किएर दुई युवाले इलामको श्रीअन्तुमा २० लाख लगानीमा कटेज सञ्चालन गरेका छन् । कतार, साउदी, यूएईलगायतका देशमा १० वर्ष बसेर फर्किएका झापा सुरुंगाका डीपी आचार्य र दुई वर्ष कतार बसेर फर्किएका इलाम फिक्कलका मन्दीप रिमालले संयुक्त लगानीमा माँ पाथीभरा कटेज सञ्चालनमा ल्याएका हुन् ।

सूर्योदयको दृश्यावलोकनका लागि प्रसिद्ध श्रीअन्तुमा पर्यटकीय सम्भावना प्रवल रहेकाले कटेज स्थापना गरेको सञ्चालक रिमालले जानकारी दिए । ‘पूर्वको प्रसिद्ध पर्यटकीय स्थलको प्रवर्धनमा समेत सहयोग पुग्ने गरी कटेज स्थापना गरेका हौं,’ उनले भने, ‘श्रीअन्तुमा पर्यटन पूर्वाधार विकास हुँदै जाँदा पर्यटक आगमन पनि बढ्दै गएको छ ।’ स्थानीय सरकार गठनसँगै विभिन्न क्षेत्रमा लगानीको वातावरण बनेको रिमालले बताए ।

माँ पाथीभरा कटेजमा २० जना पर्यटक खानबस्न सक्ने गरी सुविधासम्पन्न कोठा बनाइएको अर्का सञ्चालक आचार्यले जानकारी दिए । विदेशमा आफूले सिकेको सीपको सदुपयोग पनि होस् र पर्यटन प्रवर्धनमा पनि सहयोग पुगोस् भन्ने उद्देश्यले श्रीअन्तुमा कटेज खोल्ने योजना बनेको उनको भनाइ छ । ‘श्रीअन्तुमा आन्तरिक पर्यटक बिदा मनाउन, गर्मी छल्न र घुमघाम गर्न आउने क्रम बढेको छ,’ उनले भने, ‘पर्यटन पूर्वाधार विकाससँगै प्रचारप्रसारमा केन्द्रित हुनसके श्रीअन्तु पूर्वको महत्वपूर्ण पर्यटकीय गन्तव्य बन्न सक्छ ।’

पाँच वर्षे गुरुयोजना बनाएर काम गरिरहेका छौं : नगरपालिका
सूर्योदय नगरपालिका वडा नम्बर ४ मा पर्ने श्रीअन्तुमा केही होमस्टे र कटेज छन् भने दुईवटा पर्यटकीय स्टरका होटल निर्माण भई सञ्चालनमा आएका छन् । श्रीअन्तुको पर्यटन प्रवर्धन र विकासका लागि नगरपालिकाले पाँच वर्षे गुरुयोजना बनाएरै अघि बढेको छ । श्रीअन्तु डाँडामा रहेको टावरको सुन्दरता बढाउनका लागि चालू आर्थिक वर्षमा मात्रै नगरपालिकाले १ करोड ९५ लाख रुपैयाँ खर्च गरेको नगर प्रमुख रणबहादुर राईले जानकारी दिए । त्यसबाहेक पोखरीको सुन्दरता र वरिपरिको क्षेत्रको संरक्षणका लागि करिब १ करोड पाँच लाख विनियोजन गरिएको थियो । ‘श्रीअन्तुको पर्यटकीय सम्भावनालाई मध्यनगर गर्दै पर्यटन पूर्वाधार विकास र संरक्षणमा जुटेका छौं,’ उनले भने, ‘अबको तीन वर्षमा श्रीअन्तुलाई पूर्वको मुख्य पर्यटकीय क्षेत्र बनाउँछौं ।’ केही वर्षभित्रै पर्यटक आगमनमा उच्च वृद्धि हुने नगर प्रमुख राईले बताए । अहिले पनि श्रीअन्तुमा सिजनमा दैनिक ३ हजारभन्दा बढी पर्यटक पुग्ने गर्छन् ।

श्रीअन्तुमा पर्यटक आगमन बढ्दै जाँदा निजी लगानी आकर्षित हुने क्रम पनि बढेको छ । तर, निजी क्षेत्रबाट कति लगानी भयो भन्ने तथ्यांक नगरपालिकासँग छैन । ‘निजी क्षेत्र आकर्षित भएको छ तर कति नै लगानी भएको छ भन्ने यकिन तथ्यांक हामीसँग छैन,’ न्युज कारोबारसँग नगर प्रमुख राईले भने ।

प्रकाशित समय १५:४९ बजे