काठमाडौं । भारतीय प्रधानमन्त्री नरेन्द्र मोदी नेपाल भ्रमणका क्रममा काठमाडौं नआई जनकपुर जाने भएका छन् ।  जनकपुरमा भारतीय प्रधानमन्त्री मोदीलाई प्रधानमन्त्री केपी शर्मा ओलीले स्वागत गर्ने तयारी छ । मोदी दुईदिने भ्रमणका लागि २८ गते नेपाल आउने कार्यक्रम छ । भारतीय प्रधानमन्त्री मोदी पटनाबाट हेलिकोप्टर मार्फत सीधै जनकपुर आउने र जानकी मन्दिरमा पूजा गर्ने गृहमन्त्री रामबहादुर थापा ‘बादल’ले बताएका छन् । साथै बाह्रविघामा नागरिक अभिनन्दन गर्ने कार्यक्रम तय भएको छ । त्यसपछि मोदीले काठमाडौं र मुक्तिनाथको पनि भ्रमण गर्ने कार्यक्रम छ । भारतीय प्रधानमन्त्री मोदीको जनकपुर भ्रमणमा पाँच घेराको सुरक्षा बन्दोबस्त मिलाइएको छ । मोदीको सुरक्षा बन्दोबस्त मिलाउन नयाँ दिल्लीबाट डीआईजीको नेतृत्वमा भारतीय सुरक्षाकर्मीको टिम जनकपुर आइपुगेका छन् । भारतका उच्च ओहदाका व्यक्तित्वको सुरक्षा मामिला हेर्ने डीआईजीको नेतृत्वमा आएका सुरक्षाकर्मीको टिमले मोदीको भ्रमणका बेला अपनाइने सुरक्षा घेराको स्केच तयार पारेको छ । नेपाली सुरक्षाकर्मीको सल्लाहमा तयार पारिएको मोदीको सुरक्षा घेराको स्केच अत्यन्तै गोप्य राखिएको छ । सुरक्षामा नेपाल र भारत दुवै देशका सुरक्षाकर्मी तैनाथ हुनेछन् । मोदीको सुरक्षाका लागि पहिलो घेरामा नेपाली सेनालाई खटाइएको छ । दोस्रो घेरामा नेपाल प्रहरी, तेस्रो घेरामा सशस्त्र प्रहरी र मोदीको सबभन्दा नजिकको अन्तिम घेरामा भारतीय सुरक्षाकर्मी खटिनेछ । राष्ट्रिय अनुसन्धान विभागका गुप्तचरलाई सादा पोसाकमा अर्को घेरामा तैनाथ गरिनेछ ।

प्रकाशित समय १३:४२ बजे