प्रधानमन्त्री केपी शर्मा ओलीको गैरसंवैधानिक कदमविरुद्ध नेकपाको प्रचण्ड‑माधव समूहले आयोजना गरेको बृहत् विरोध प्रदर्शनका कारण काठमाडौँको ट्राफिक व्यवस्थापन अस्तव्यस्त बनेको छ । सबैभन्दा बढी राजधानीको चक्रपथभित्रको ट्राफिक व्यवस्थापन भद्रगोल बनेको छ ।

जुलुस र भीडभाड रोक्न प्रहरीले माइतीघरबाट सर्वोच्च अदालत हुँदै सिंहदरबारतर्फ जाने सडक बन्द गराएपछि यात्रु हिँडेरै गन्तव्यतिर गइरहेका छन् ।

नेकपाले आज एक लाख मानिस उतार्ने भएको छ । पुरानो बसपार्कदेखि भद्रकाली र प्रदर्शनी मार्गसम्मको सडक प्रदर्शनकारीबाट भरिने अपेक्षामा नेकपाले सोहीअनुसार तयारी गरेको छ । टुँडिखेलको पर्खालसँगै जोडेर मञ्च निर्माण गरिएको छ ।

यसअघि पुस १२ गते प्रचण्ड–माधव समूहले भृकुटीमण्डप अगाडिको सडकमा आयोजना गरेको विरोधसभामा पनि हजारौँ प्रदर्शनकारी भेला भएका थिए । त्यसबेला ५० प्रदर्शनकारी उतार्ने लक्ष्य लिएको नेकपाले त्योभन्दा बढी भेला भएपछि ठूलो ठाउँ खोज्दै यसपटक भद्रकाली-पुरानो बसपार्क सडक रोजेको हो । अहिले त्यसो सडकखण्डमा गाडी जान दिइएको छैन ।

नेकपाले काठमाडौँ र ललितपुरका नौ स्थानबाट जुलुस निकाल्दै छ । माइतीघर, डिल्लीबजार, लैनचौर, त्रिपुरेश्वर, कुपण्डोल, प्रदर्शनी मार्ग, त्रिचन्द्र कलेज, शान्तिबाटिकालगायतका स्थानबाट निस्किने जुलुस रत्नपार्कमा भेला भएर मूल जुलुसमा रुपमा परिणत हुने नेकपाले जनाएको छ । विरोध सभालाई अध्यक्षहरू पुष्पकमल दाहाल ‘प्रचण्ड’ र माधवकुमार नेपाल, नारायणकाजी श्रेष्ठलगायतका नेताहरूले सम्बोधन गर्नेछन् ।

केपी ओलीले पुस ५ गते असंवैधानिक ढंगले संसद विघटन गर्न गरेको सिफारिस राष्ट्रपति विद्यादेवी भण्डारीले स्वीकृत गरेपछि सबै दल, नागरिक समाज, बुद्धिजीवी, कानुन व्यवसायी आन्दोलनमा छन् ।

प्रकाशित समय १२:०१ बजे