संघीय मामिला तथा सामान्य प्रशासन मन्त्रालय अगाडि अस्थायी, करार र ज्यालादारी कर्मचारी धर्नामा बस्न थालेपछि सुरक्षा व्यवस्था कडा गरिएको छ । सरकारले उनीहरुलाई कामबाट हटाउने निर्णय गरेपछि सिंहदरबारस्थित सामान्य प्रशासन मन्त्रालय अगाडि धर्ना दिँदै आएका छन् ।

कर्मचारी धर्नामा बस्न थालेपछि मन्त्रालय परिसर अगाडि प्रहरीले सुरक्षा घेरा बढाएको छ । सिंहदरबार प्रवेशमा परिचयपत्र, प्रवेशपत्र वा नागरिकताको जाँचमा समेत कडाइ गरिएको छ । संघीय संरचनानुसार समायोजनमा परेर हटाइएका कर्मचारीले आफ्नो रोजीरोटीको सुनिश्चितता गर्न माग गर्दै कार्यालय समयमा मन्त्रालयको प्रवेशद्वारमा दैनिक चार घण्टा धर्ना दिन थालेपछि  सुरक्षाकर्मीले कडाई गर्न थालेका हुन् ।

विभिन्न मन्त्रालय, विभाग, आयोग, सचिवालय, कार्यालय र जिल्ला अन्तर्गतका अस्थायी, करार र ज्यालादारी कर्मचारीले २४० दिन काम गरेकालाई स्थायी प्रक्रियामा सामेल गराउन माग गर्दै तीन दिनदेखि धर्नामा बस्दै आएका छन् । करार, ज्यालादारी कर्मचारीलाई विगतमा सरकारले गरेको सम्झौताअनुसार व्यवस्थापन गर्न आपूुहरुले माग गर्दै आएको आधिकारिक ट्रेड युनियनका उपाध्यक्ष भोला पोखरेलले बताए ।

उनले न्यूज कारोबारसंग भने, ‘अस्थायी, करार, ज्यालादारी र ठेकेदारी कर्मचारीलाई सरकारले नियम र विगतमा भएका सम्झौता अनुसार व्यवस्थापन गर्नुपर्छ ।’ सरकारले ३२ हजार कर्मचारीको रोजिरोटी खोस्न लागेको भन्दै उनले त्यसो भए विद्रोह हुने चेतावनी दिए ।

अखिल नेपाल सरकारी अस्थायी, करार तथा ज्यालादारी कर्मचारी श्रमिक संघका संयोजक कुमार राउतले आफूहरुको रोजिरोटी नखोस्न सरकारलाई चेतावनी दिएका छन् । माग पूरा नभए सिंहदरबारमा जे पनि गर्न सकिने उनको चेतावनी छ । ‘छठसम्म माग पूरा नभए सशक्त आन्दोलन गर्छौँ । हामी मर्न पनि तयार छौँ । रोजिरोटी खोसिएका कर्मचारीका परिवारलाई सिंहदरबार छिराउँछौँ,’ उनले भने ।

प्रकाशित समय १३:३१ बजे