नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले शान्ति सम्झौतामा गरिएका प्रतिवद्धता लागू नगरिए नचाहँदा नचाहँदै पनि देशमा पुनः द्वन्द्व उत्पन्न हुने चेतावनी दिएका छन् । जिल्ला समन्वय समिति पश्चिम रुकुमले काठमाडौंमा आयोजना गरेको न्यायिक समितिः ‘कार्यविधि र प्रक्रिया’ पुस्तक लोकार्पण समारोहमा शुक्रबार प्रचण्डले यस्तो बताएका हुन् ।

प्रचण्डले अहिलेकै अवस्था निरन्तर रहेमा मधेसमा एक ढंगले र पहाडमा अर्को ढंगले विकराल स्थिती उत्पन्न हुने औल्याए । उक्त परिस्थिति उत्पन्न भए विगतमा जस्तै १२ बुँदे र शान्ति सम्झौता जस्तै सहज तरिकाले समाधान ननिस्कने चेतावनी उनले दिए । ‘शान्ति प्रक्रियामा हिजो लडेकाहरु अहिले निधार खुम्चाएर सोच्नुपर्ने अवस्था आएको छ,’ प्रचण्डले भने, ‘हल्का रुपमा सोचिरह्यो भने देशलाई  गाह्रो पर्न सक्छ ।’

माओवादी समाप्त भयो भनेर नसोच्न उनको चेतावनी थियो । ‘माओवादीलाइ कसैले सिध्याइयो भन्ने ठानेको छ भने अर्को माओवादी जन्मन्छ,’ प्रचण्डले भने, ‘विभेदमा परेकालाई अधिकार दिने कुरालाई हल्का रुपमा लिएमा दुर्भाग्य हुन्छ ।’ संविधानले प्रत्याभूत गरिएका अधिकार हनन हुने परिस्थिति आए स्थिति भयानक हुने उनको चेतावनी छ ।

सत्तारुढ दल नेपाल कम्युनिस्ट पार्टी (नेकपा)का अध्यक्ष समेत रहेका प्रचण्ड सरकारविरुद्ध समेत खनिए । उनले संविधानले व्यवस्था गरेको अधिकार प्रदेश र स्थानीय तहलाई प्रत्यायोजन गर्न नचाहेको भन्दै सरकारको चर्को आलोचना गरे ।  स्थानीय र प्रदेश सरकारलाई दिएको संवैधानिक अधिकार प्रत्यायोजन गर्न सरकार तयार नभएको अध्यक्ष दाहालको आरोप छ ।

प्रकाशित समय १७:५१ बजे