नेपाल कम्युनिस्ट पार्टी (नेकपा)मा सांगठानिक एकता पेचिलो बनेको छ । समायोजनका लागि गठित कार्यदलले एकतालाई अन्तिम रुप दिन नसकेपछि नेकपामा विवाद चर्केको हो ।

कार्यदलको म्याद थप गर्ने नगर्नेबारे नेकपामा विवाद छ । गृहमन्त्रीसमेत रहेका संयोजक रामबहादुर थापा नेतृत्वको कार्यदल विघटन गर्न पार्टी अध्यक्षसमेत रहेका प्रधानमन्त्री केपी शर्मा ओलीले प्रस्ताव राखेका छन् । विघटनको प्रस्तावमा बहुमत सदस्यले विमति जनाएका छन् ।

सचिवालयले आज प्रधानमन्त्री निवास बालुवाटारमा कार्यदल सदस्यहरुसँग छलफल गरेको थियो । बैठकमा प्रधानमन्त्रीसँगै नेता इश्वर पोखरेल कार्यदल विघटन गर्ने पक्षमा उभिए भने कार्यदलका बहुमत सदस्य भने आफूहरुले काम गर्न नसकेको नभई काम गर्न नदिइएको जवाफ फर्काएको नेकपा स्रोतले जनाएको छ ।

कार्यदलले भने प्रतिवेदन तयार पार्न एक साताको समय माग गरेको छ । यसअघि कार्यदलले अधुरो प्रतिवेदन तयार पारेको थियो । बैठकपछि कार्यदल सदस्य योगेश भट्टराईले भने, ‘प्रतिवेदन बनाउन एक साताको समय मागेका छौं, सो समयमा प्रतिवेदन तयार गर्छौ ।’ शुक्रबार बस्ने सचिवालय बैठकले सो विषयमा निर्णय गर्ने बताइएको छ ।

नेकपाले तल्ला कमिटी एकता गर्न ९ सदस्यीय कार्यदल बनाएको थियो । रामबहादुर थापाको संयोजकत्वमा बनाइको कार्यदलमा विष्णु पौडेल, सुरेन्द्र पाण्डे, शंकर पोखरेल, वर्षमान पुन, योगेश भट्टराई, बेदुराम भुषाल, लेखराज भट्ट, रघुवीर महासेठ सदस्य छन् । कार्यदललाइ १५ दिनको समयसीमा तोकेर एकताको प्रस्ताव तयार पार्ने भनिएको थियो ।

प्रकाशित समय ११:५२ बजे