काठमाडौबाट धनगढी पुगेका नेता भीम रावलले विमानस्थलको विशिष्ट कक्ष प्रयोग गर्न नपाएपछि आक्रोस व्यक्त गरेका छन् ।

शनिबार विहान काठमाडौंबाट श्री एयरलायन्सको विमानमा ९ः१५ मा धनगढी पुगेका नेपाल कम्यूनिष्ट पार्टी (नेकपा)का स्थायी कमिटी सदस्य तथा सुदूरपश्चिम प्रदेश इन्चार्ज रावलले पत्रकार सम्मेलनको आयोजना गरेर आक्रोश व्यक्त गरेका छन् ।

पत्रकार सम्मेलनमा बोल्दै नेता रावलले आफूले विमानस्थलको विशिष्ट कक्ष प्रयोग गर्न नपाएकोमा गुनासो नभए पनि आफूलाई सुरक्षा व्यवस्थाबारे जानकारी नदिएकोमा आक्रोश व्यक्त गरे । उनले विशिष्ट कक्ष प्रयोग गर्न नपाएपछि ट्रली बोक्ने बाटोबाट विमानस्थलबाट बाहिर निस्कनु परेको गुनासो गरे । उनले पत्रकार सम्मेलनमा पटक–पटक आफूमाथि त्यस्तो व्यवहार किन गरिएको भन्ने जिज्ञासा राखे ।

शनिबार धनगढीबाट राष्ट्रपति विद्यादेवी भण्डारीको काठमाडौं फर्कने कार्य सूचि रहेको थियो । राष्ट्रपति काठमाडौं फर्कनका लागि विमानस्थल जादै थिइन् । सोही कारण विशिष्ट कक्षमा सुरक्षा व्यवस्था कडाई गरिएको थियो ।

तर, निर्धारित कार्यक्रमअनुसार आफू धनगढी आउने पार्टीका नेता कार्यकर्तालाई जानकारी भए पनि आफूलाई पार्टीले राष्ट्रपतिको कुनै कार्यक्रमबारे जानकारी नगराएको भन्दै नेता रावलले विशिष्ट कक्षमा को–को, कस्ता–कस्ता व्यक्ति जान पाउछन ? भन्ने सूची बनाइयो र त्यसमा हाम्रो पद परेन भने सर्वप्रथम त्यो कार्यान्वयन गर्न आफू तयार रहेको बताए ।

त्यस्तै अर्को प्रशंगमा बोल्दै इन्चार्ज रावलले एमसिसीमा जनताको चाँसो बढेकोमा खुशी व्यक्त गरे । उनले एमसिसीबारे तयार पारिएको प्रतिवेदनलाई अन्तिम रुप दिन पार्टीले कार्यदल गठन गरेको बताउँदै पार्टीको आधिकारिक धारणा नआएकाले यस विषयमा आफू धेरै नबोल्ने बताए ।

प्रकाशित समय १४:२५ बजे