अंग्रेजी नयाँ वर्षको अवसरमा पोखरामा करिब ६० प्रतिशत होटल अग्रिम बुकिङ भएका छन् । डिसेम्बर ३०, ३१ र जनवरी १ तारिखसम्मको लागि हाल ६० प्रतिशत होटलको रुमहरु अग्रिम बुकिङ भएको पश्चिमाञ्चल होटल संघका अध्यक्ष विकल तुलाचनले बताए ।

अधिकांश नेपाली पर्यटकहरुले अन्तिम समयमै बुकिङ गर्ने गरेको उनले जनाए । अंग्रेजी नयाँ वर्षको अवसरमा शनिबारसम्म पोखराका होटलको करिब ४० प्रतिशत जसो अकुपेन्सि रहेको संघका अध्यक्ष तुलाचनले बताए । उनका अनुसार पोखरामा तेश्रो मुलुकका पर्यटकको होटल अकुपेन्सि करिब १५ प्रतिशत छ ।

विदेशी पर्यटकसहित भारतीय र आन्तरिक पर्यटक गरी हाल पोखरामा ४० प्रतिशत होटल अकुपेन्सि रहेको अध्यक्ष तुलाचनले जनाए ।

उनका अनुसार पोखरामा हाल दैनिक एक रातमा २० हजार पर्यटकहरुलाई राख्न सकिन्छ । हाल करिब पयर्यटकस्तरिय ४ सय होटल संघमा दर्ता भएका छन् भने एक सयको हाराहारीमा दर्ता बाहिर छन । १० हजार रुम रहेको पोखरामा २० हजार वेड रहेको उनले बताए ।

पोखराका होटलमा करिब एक खर्ब लगानी भएको व्यवसायीको दाबी छ । अगेंजी नयाँ वर्षको अवसरमा पोखरामा जारी सडक महोत्सवको अवसरमा आगन्तुक पाहुनाहरुलाई रेष्टुरेण्टको बिभिन्न खानामा १० प्रतिशतसम्म छुटको व्याबस्था गरेको रेवान पोखराका अध्यक्ष भिमसेन भुजेलले बताए ।

रेवान पोखराका पूर्वअध्यक्ष सूर्यबहादुर भुजेलले सडक महोत्सवको अवसरमा होटलको रुममा ५० प्रतिशतसम्म मूल्य बृद्धि हुने बताएका थिए ।

यसैबीच, अंग्रेजी नयाँ वर्षको अवसरमा पोखरामा जारी सडक महोत्सवको अवसरमा व्यवसायीहरुले चर्को मूल्य लिने गरेको आरोप लागेको समयमा यस पटक पनि कसैले बढी मूल्य लिएमा प्रशासनले कारवाही गर्ने चेतावनी दिएको छ ।

कास्कीका प्रमुख जिल्ला अधिकारी चक्र बहादुर बुढाले कुनै मेला वा महोत्सवको अवसर पारी कसैले तोकेको मूल्य भन्दा एक रुपैयाँ पनि बढी लिएको भेटिएमा कार्बाही गर्ने चेतावनी दिएका हुन् । ‘कुनै मेला र महोत्सवको अवसरमा कसैले मौका छोपेर आम उपभोक्ता तथा पर्यटकहरुलाई ठग्ने नियतले बढी शुल्क लिएको प्रमाण भेटिएमा हामी कारवाही गरी छाड्छौं,’ उनले भने ।

प्रकाशित समय १७:१२ बजे