१३औँ दक्षिण एसियाली खेलकुद (साग)अन्तर्गत जनकपुरमा आयोजना हुने कुस्ती प्रतियोगिताको सम्पूर्ण तयारी पुरा भएको छ । कभर्ड हलको मर्मतसम्भारदेखि खेलाडीहरुको बासस्थान लगायतको तयारी पुरा भएको धनुषा जिल्ला खेलकुद विकास समितिका अध्यक्ष कमलकिशोर चौधरीले जानकारी दिए ।

उनका अनुसार खेलमा सहभागी हुने सबै खेलाडीहरु बुधबार नै जनकपुर आइसकेका छन् । शुक्रबारदेखि चार दिनसम्म चल्ने कुस्तीमा नेपालसहित भारत, बंगलादेश, श्रीलंका र पाकिस्तानका खेलाडीले प्रतिस्पर्धा गर्दैछन् ।

यसमध्ये पाकिस्तानबाहेक चारवटै देशका महिला कुस्तीवाजहरुले पनि सागमा भाग लिएका छन् । कुस्तीमा माल्दिभ्स र भुटानले भाग लिएका छैनन् । जनकपुरमा ठाउँ नपुगेपछि खेलाडीहरुलाई बर्दिबासमा पनि राखिएको आयोजकले जनाएको छ ।

कुस्तीका सम्पूर्ण खेलहरु जनकपुरस्थित कभर्डहलमा हुनेछ । हलभित्र सीमित दर्शकमात्र अटाउने भएकाले कबर्डहलबाहिर र जानकी मन्दिर परिसरमा ठूलो पर्दा लगाएर प्रत्यक्ष प्रसारणको व्यवस्था आयोजकले मिलाएको छ ।

कुस्तीमा भाग लिने नेपाली खेलाडीहरु

नरेश यादव, सरोज यादव, बुन्नीलाल राउत अहिर, राज यादव, सागर यादव, सुरेश चुनारा र सुमिरकुमार साहले नेपालको तर्फबाट कुस्तीमा भाग लिनेछन् । चुनारा महेन्द्रनगरका हुन् भने बाँकी खेलाडी प्रदेश २ का हुन् ।

महिलातर्फ मनिषा सिंह, संगीता धामी, सुशिला चन्द, सिवांगी दुवे, अम्बिका भण्डारी, निर्मला जागरी र कोमल खत्रीको नाम सिफारिस भएको छ ।

प्रकाशित समय १२:१५ बजे